Policia e Durrësit arrestoi 3 të rinj që po trafikonin 2000 kapsolla elektro-detonatore, në një operacion të koduar “Ditë Vere”.
Ata u ndaluan nga policia në zonën e njohur si Shkëmbi i Kavajës në momentin e shitjes së kapsollave elektro-detonatore – një lloj i eksplozivit që për të shpërthyer përdor energjinë elektrike, me ndezje të drejtpërdrejtë përmes telave përcjellës.
3- vjeçari me iniciale A. Q., lindur dhe banues në Përmet kishe mbërritur në Durrës për t’i shitur lëndët plasëse 22-vjeçarit me iniciale Xh. V., i dënuar më parë dhe që shoqërohej nga 18-vjeçarja me iniciale L. B., të dy banues në Durrës.
Përveç 2000 kapsollave që u gjetën në një çantë krahu, 22-vjeçarit me iniciale Xh. V. që lëvizte me një automjet, policia i gjeti një thikë, një xhaketë dhe një pulovër me simbole të policisë, një kapuç dhe 4 aparate celulare.
Policia i referoi materialet në Prokurorinë e Durrësit për veprat penale, “Prodhimi dhe mbajtja pa leje e armëve luftarake dhe e municionit”, “Prodhimi dhe mbajtja pa leje e armëve të ftohta”, “Mbajtja pa të drejtë e uniformës” dhe “Trafikimi i armëve dhe i municionit”.
Më herët përgjatë muajve qershor korrik 2021 Policia e Durrësit në operacione të ndryshme ndaloi disa persona që po trafikonin lëndë shpërthyese, të llojit tritol dhe C-4.
