Giuseppe Palumbo jetonte në Durrës prej disa vitesh, por ai vendosi të blejë shtëpi vetëm kur u kurorëzua në martesë me partneren e tij shqiptare.
“Bleva një apartament në shëtitoren “Taulantia”, pranë detit, pasi edhe çmimet po rriteshin vazhdimisht,” tha për BIRN Giuseppe, i cili ka lënë Napolin, qytetin e lindjes për ta kaluar periudhën e pensionit në bregdetin shqiptar.
Palumbo është pjesë e një grupi të madh pensionistësh nga Italia që jetojnë në Durrës dhe në Tiranë, dhe që sipas një marrëveshjeje mes dy vendeve nuk taksohen për vlerën e pensionit.
Por kohët e fundit numri i të huajve që blejnë banesa në Durrës është rritur, dhe në ndryshim me fillimvitet 2000 ata vijnë kryesisht nga vendet e Europës Lindore.
Noteri Juledo Beqiraj, tha për BIRN, se shtetas nga, kanë blerë në më pak se dy vjet rreth 200 apartamente banimi.
Blerësit që vijnë nga vendet e Europës Lindore kërkojnë hyrje në pallatet që shohin nga ana e detit, dhe njëkohësisht edhe Çertifikatën e Pronësisë së apartamentit.
Sipas Beqirajt, në shumicën e shitjeve janë përfshirë banesa në plazhin tradicional, në jug të qytetit, si dhe ato të Shkëmbit të Kavajës dhe të Golemit.
Disa muaj më parë dy agjenci immobiliare, përkatësisht në Pragë dhe në Tiranë kryen shitblerjen e 104 apartamenteve, që të gjithë në zonën bregdetare të Durrësit, ndërkohë që shitje të tjera janë kryer edhe në zonën e Gjirin të Lalzit.
Alfred Spiro, i cili menaxhon një hotel në stabilimentin “Hekurudha” tha për BIRN se një fenomen i tillë në rritje mund të sjellë edhe përmirsimin e infrastrukturës në zonën e Plazhit.
Plazhi ka nevojë për kinema, për një Qendër kulturore, apo edhe për një kënd masiv lodrash për fëmijë.
Që prej tre vitesh në hotelin që Spiro menaxhon kalojnë pushimet e verës familje që vijnë kryesisht nga Serbia, ndërsa kohët e fundit po shtohen edhe pushues të tjerë lindorë.
“Kjo ka sjellë edhe rritjen e çmimeve, jo vetëm për shitblerjet e apartamenteve, por edhe për dhënien e tyre me qera,” thotë Florian Tahiri, drejtues në një agjenci immobiliare në Durrës.
Tahiri sot ka zhvilluar një takim me përfaqësuesit e një agjencie simotër në Varshavë.
“Ne biseduam mbi të ardhmen e investimeve të qytetarëve nga Polonia në zonën e Durrësit,” shpjegoi Tahiri.
Përfaqësuesi polak Piotr Lukashevski tha për BIRN se apartamentet e bukur dhe me pamje nga deti janë pjesë e interesit tonë dhe jo vetëm për pallatet e përfunduar”.
“Ne mund të arrijmë në marrrëveshje kontraktuale edhe për pallatet në ndërtim e sipër,” theksoi Lukashevski i agencisë RCS, duke pohuar se Polonia mbetet vendi më i interesuar për pushime dhe për investime në blerjen e apartamenteve në Durrës.
Interesimi i të huajve, si dhe i shtetasve kosovarë për zonën bregdetare, u rrit sidomos pas shpalljes së projektit të krijimit të portit turistik në Durrës, çka përshpejtoi ngritjen e 8 hoteleve si dhe ndërtimin e një kompleksi pallatësh.
“Ne kemi patur kërkesa nga të huajt, jo vetëm për banesat e ngritura pranë territorit të sotëm portual, por edhe në zonat bregdetare pranë tij,” nënvizon Florian Tahiri.
Sipas Tahirit blerësit e huaj më së shumti mund ti përdorin si banesa të dyyta pushimi, por mund ti lëshojnë me qira për bashkëatdhetarët e tyre të interesuar gjatë stinës së verës.
Brenda dy vjetësh Durrësi u përball me pasojat e tërmetit të 26 nëntorit 2019, ndërsa një efekt të ndjeshëm shkaktoi edhe pandemia e zgjatur nga Covid – 19, dhe sipas specialistit Tahiri, vetëm në këtë përiudhë në qytet u dyfishua numri i zyrave immobiliare.
Një pjesë e familjeve që u larguan nga apartamenteve të tyre pas dëmtimeve të tërmetit, vazhdojnë të jenë në banesa me qira, ndërsa rritja e numrit të blerjeve nga të huajt ka ndikuar edhe në ndryshimin e çmimeve.
“Një pallat shumëkatësh në bregdet është bërë objekt interesimi nga ana e blerësve të huaj,” tha noteri Juled Beqiraj, megjithëse çmimet në zonën e shëtitores në Durrës rriten vazhdimisht.
Sipas noterit nga Durrësi, aktualisht çmimi në këtë zonë ka arritur në 1,250 euro/metër katror, kur në vitin 2015 kur nuk e kalonte shifrën 750 euro/metri katror.