Vendimi parashikon që qytetarët që po i ikin luftës në Ukrainë të qëndrojnë në vendin tonë pa leje qëndrimi për një periudhë 1-vjeçare.
“Në mbështetje të nenit 100 të Kushtetutës dhe të pikës 2, të nenit 29, të ligjit nr.79/2021, “Për të huajt”, me propozimin e ministrit të Brendshëm dhe të ministrit për Evropën dhe Punët e Jashtme, Këshilli i Ministrave vendosi Shtetasit e Ukrainës kanë të drejtë të hyjnë dhe të qëndrojnë pa leje qëndrimi në Republikën e Shqipërisë për një afat deri në 1 (një) vit”- thuhet në vendimin e qeverisë.
Vendimi është një akt formal i vullnetit të shprehur nga institucionet shqiptare për mikpritjen e refugjatëve të luftës në Ukrainë, ngjashëm siç po veprojnë dhe vendeve e tjera europiane.
Qeveria nuk ka përcaktuar ndonjë kufi për numrin e refugjatëve që do të presë nga konflikti në Ukrainë dhe as nuk ka bërë publike masat e marra për pritjen e tyre.
Rreth 3.2 milionë ukrainas kanë lënë shtëpitë e tyre duke kërkuar strehim në vendet e Bashkimit Europian që prej nisjes së pushtimit rus në 24 shkurt.
Shqipëria ka mbështetur vendimet e marra në Këshillin e Sigurimit në OKB dhe në NATO lidhur me sanksionet ndaj Rusisë dhe Kuvendi shqiptar miratoi para disa ditësh një rezolutë në mbështetje të sovranitetit territorial të Ukrainës. Në rezolutën e miratuar me konsensus politik dënohej agresionin ushtarak rus dhe i bëhej thirrje Rusisë për ndalimin e menjëhershëm të përdorimit të forcës ndaj Ukrainës.
