Pas prishjes së një objekti të konsideruar të paligjshëm buzë detit në zonën e Rradhimës në Vlorë, i cili ishte skualifikuar në vitin 2019 nga procesi i legalizimit Inspektorati Kombëtar i Mbrojtjes së Territorit dështoi të prishte një godinë trekatëshe hoteli aty pranë.
Aksioni që filloi mëngjesin e të hënës dhe që sipas zyrtarëve pritet të prishë 10 godina në zonën e Orikumit, u bllokua për 12 orë pasi pronarët e hotelit u ngujuan familjarisht në katin e tre të tij. Pas një sërë përpjekjesh për të negociuar dhe refuzimit të familjarëve për tu larguar nga godina e protestës së banoërve, me ndërhyrjen e drejtuesit të policisë së Vlorës, Gentjan Berberi, forcat e policisë dhe fadromat u tërhoqën.
IKMT pretendon se godina duhet të prishet pasi është skualifikuar nga procesi i legalizimit, por anëtarët e familjes Havaraj këmbëngulin se atyre u ishte premtuar legalizimi.
Objekti në fjalë, shfrytëzohej nga një shtetase Italiane, Mariana Carrillo, e cila thotë se e ka marrë atë me qira 5 vjeçare. Ajo tha se nuk ishte njoftuar paraprakisht dhe se brenda në hotel kishte pasur pushues kur ishte marrë njoftimi për boshatisje.
Armando Cakrani, i cili përfaqëson familjen Havaraj i tha BIRN se procedurat e nisura nga IKMT Tiranë për këtë godinë në vitin 2019, janë në kundërshtim me ligjin për legalizimin dhe Planin e Përgjithshëm vendor të viti 2017. “Çdo veprim administrativ i kaluar dhe i sotëm është totalisht i pa bazuar, korruptiv dhe klientelist”, tha avokati dhe këmbënguli se i mbrojturi prej tij ishte pronar i ligjshëm i godinës.
Ndërhyrjet e qeverisë për të prishur godina banimi apo biznese shoqërohen prej vitesh me përplasje të ashpër dhe shpesh godinat janë zbrazura pasi policia ka përdorur gaz lotsjellës ndaj pronarëve të ngujuar në to.
