Komisioni për Ekonominë dhe Financat shqyrtoi dhe miratoi të martën dy kandidatura për vendet vakante në Këshillin Mbikqyrës të Bankës së Shqipërisë. Kandidaturat e përzgjedhura dhe të mbështetura me numrin e nevojshëm të firmave të deputetëve janë Anastas Angjeli dhe Natasha Ahmetaj, të dy të mbështetur nga grupi parlamentar i PS-së. Angjeli ka një karrierë politike në PS, ish-ministër dhe ish-deputet, ndërsa Ahmetajt e cila mban detyrën e zëvendësguvernatorit të dytë të BSH-së, po kërkon një mandat të ri në Këshillin Mbikqyrës.
Drejtuesja e mbledhjes, Blerina Gjylameti, tha se pas dëgjesave të zhvilluara me të gjitha kandidaturat e paraqitura për dy vakancat, kandidaturat e Angjelit dhe Ahmetajt, përtej vlerësimit që kanë marrë në komision për përvojën, meritat profesionale dhe vizionin e tyre, përmbushin kriteret ligjore dhe kanë marrë mbështetjen e 28 deputetëve, siç parashikohet në ligj.
Emrat nuk u kontestuan nga përfaqësuesit e opozitës, por deputeti i PD-së Arbi Agalliu kontestoi faktin që ato janë të propozuar vetëm nga mazhoranca duke e lënë sipas tij opozitën pa përfaqësim në këtë institucion të pavarur. “Banka Qendrore është e pavarur dhe do ishte e udhës që të kishte një lloj përfaqësie dhe nga opozita. T’i rikthehemi një tradite që ka ekzistuar të paktën në BSH, ku anëtarët e Këshillit Mbikqyrës, të kenë një lloj gjithëpërfshirje të pozitës dhe opozitës”- tha ai. Agalliu e cilësoi ndërhyrjen e tij një propozim për mazhorancën që të ketë “një lloj konsensusi përsa i përket përfaqësimit në këtë Këshillin Mbikqyrës”.
Propozimi i deputetit të PD-së u cilësua i vonuar nga Gjylameti, e cila tha se “nuk kemi penguar njeri që t’i përgjigjej thirrjes për të kandiduar”. “I kemi kaluar sëbashku të dy kandidaturat të cilat janë mbështetur nga 28 firma”- tha ajo duke shtuar se kjo është një “etapë e përfunduar” nga ana ligjore.
Në përfundim komisioni vendosi që kandidaturat t’i kalojnë për shqyrtim seancës plenare, ku miratimi i tyre kërkon një shumicë të thjeshtë votash. Deputeti i PD-së, Bujar Leskaj, anëtar i komsiionit, i tha BIRN-ut se të dy emrat janë mbështetur nga PS-ja, por ai do t’i votonte për shkak të vlerësimit që ka për karrierën e tyre profesionale. “Nuk ka ndonjë vendim politik të grupit demokrat për këtë votim, deputetët janë të lirë të votojnë sipas mendimet të tyre”- tha ai.
Komisioni i Ekonomisë realizoi gjatë dhjetorit dëgjesa publike me 17 kandidatët për dy vendet vakante dhe Angjeli u mikprit nga të gjithë anëtarët e komisionit të Ekonomisë, duke marrë vlerësime superlative edhe nga deputetët e opozitës. Angjeli mbahet mend si një nga ministrat e sulmuar për korrupsion nga ish-kryesocialisti Fatos Nano, gjatë fushatës për “katarsis” brenda partisë në vitin 2001.
Për 2 vendet vakante në BSH u paraqitën 17 kandidatura; Natasha Ahmetaj, Anastas Angjeli, Senida Mesi, Artur Mamadhaj, Marta Muço, Rezarta Bitri, Edvin Libohova, Indrit Banka, Elvin Meka, Mateo Spaho, Durim Kraja, Diana Dervishi, Altin Hoti, Emis Çerava, Manuela Tandini, Onorina Jata dhe Blendi Sena.
