Gjykata e Posaçme njoftoi të enjten se kishte shpallur fajtore ish-zëvendësministren e Brendshme Rovena Voda dhe dy shtetase që bashkë me të akuzohen për “ushtrim të ndikimit të paligjshëm”.
Rovena Voda, Majlinda Hasani dhe Florida Beu u dënuan me nga 1 vit e tre muaj burg, por për shkak të gjykimit të shkurtuar dënimi u ul me një të tretën. Përfundimisht bazuar në vendimin e Gjykatës së Posaçme të Shkallës së Parë, Voda dhe dy të pandehurat e tjera do të vuajnë nga 10 muaj burg nëse vendimi merr formë të prerë. Më vete Voda u dënua edhe me 5 vjet heqje të së drejtës për të ushtruar funksione publike.
Voda dhe të akuzuarat i kanë mohuar akuzat. Eugen Beçi, i cili përfaqësoi në gjykatë Vodën si avokat i tha BIRN se vendimi do apelohej. “Pasi të zbardhet do vlerësojmë çdo detaj dhe sigurisht që do e apelojmë”, tha ai. Avokati tha se ata kërkonin pafajësi.
Ish-zëvendësministrja ishte me masë sigurimi arresti në shtëpi që prej korrikut të vitit të kaluar. SPAK e akuzoi atë për mitmarrje dhe ushtrim të ndikimit të paligjshëm, pasi e kapi në përgjime të pranonte 1 mijë euro, një telefon celular dhe një arkë me peshk, në këmbim të një vendi pune për të pandehurën Florinda Beu.
