Një hetim i SPAK dhe i Prokurorisë Speciale të Kosovës u përmbyll të premten me arrestimin e mbi 50 oficerëve të policisë në dy krahët e kufirit. Në një njoftim për shtyp Struktura e Posaçme Kundër Korrupsionit njoftoi se ishin marrë masa arresti për 32 oficerë të policisë kufitare në Drejtorinë e Policisë në Kukës të cilët akuzohen për “312 episode të veprimeve korruptive”.
Një aksion i ngjashëm u zhvillua edhe në krahun tjetër të kufirit. Prokuroria Speciale e Republikës së Kosovës dhe Inspektorati Policor i Kosovës njoftuan arrestimin e 20 oficerëve të policisë së pikës kufitare të Vermicës.
Ministri i Brendshëm Bledi Çuçi e përshëndeti aksionin dhe cilësoi atë një “hetim model për ndëshkimin e korrupsionit dhe shpërdorimit të detyrës”.
Por ndërsa në Shqipëri arrestimet filluan të premten Kosova ka prej rreth një muaji që ka bërë operacione të ngjashme në pikat doganore në kufi me Shqipërinë dhe ka arrestuar më herët rreth 50 oficerë dhe agjentë doganorë. Drejtuesit e Policisë së Kukësit të pyetur nga BIRN pas arrestimeve në Qafën e Prushit dhe në Qafë Morinë në 15 mars mohuan të kishin informacione. Të premten ata nuk ishin të arritshëm për komente.
Të premten SPAK njoftoi se hetimet për funksionarët e policisë kufitare përfshi drejtuesit e tyre kishin filluar që në nëntor të vitit 2020 në bazë të një kallëzimi nga Shërbimi për Çështjet e Brendshme dhe Ankesat, i ri pagëzuar së fundmi si Agjencia e Mbikëqyrjes Policore, AMP.
“Prokuroria e Posaçme, në bashkëpunim me Shërbimin për Çështjet e Brendshme dhe Ankesat dhe Drejtorinë e Përgjithshme të Policisë së Shtetit kanë kryer hetime proaktive, duke përdorur metoda speciale të hetimit. Gjithashtu hetimet janë kryer në koordinim dhe në bashkëpunim me Prokurorinë Speciale të Republikës së Kosovës”, thuhet në njoftimin për shtyp të SPAK.
Sipas prokurorisë gjatë hetimeve janë verifikuar “rastet të shumta korruptive të kryera në vijimësi gjatë ushtrimit të detyrës nga e këtyre punonjësve, duke detyruar shtetas shqiptar dhe të huaj që të paguanin shuma të ndryshme parash për kalimin nga Shqipëria në Kosovë dhe anasjelltas”.
SPAK thotë se punonjësit e policisë kishin favorizuar futjen e mallrave kontrabandë, trafikun e automjeteve, kalimin e kufirit të personave të ndryshëm me problematika ligjore.
Prokuroria njoftoi se Gjykata e Posaçme kishte miratuar 34 masa sigurimi personal, “nga të cilat 32 punonjës të Policisë Kufitare Kukës, me funksione të ndryshme brenda Drejtorisë të Kufirit dhe Migracionit Kukës, duke përfshirë edhe Drejtorin e kësaj Drejtorie, për kryerjen e veprave penale “Shpërdorimi i detyrës”, “Korrupsioni pasiv i personave që ushtrojnë funksione publike”, në bashkëpunim, “Ushtrim i ndikimit të paligjshëm ndaj personave që ushtrojnë funksione publike”.
Për 17 punonjës policie masa e sigurisë është burg, 14 persona janë me masë sigurimi arrest shtëpie, 12 punonjës policie dhe dy civilë të kapur nga ky hetim, ndërsa janë pezulluar 3 punonjës policie.
