Britania njoftoi të hënën sanksione kundër liderit serb të Bosnjës Milorad Dodik dhe Zeljka Cvijanoviç për, siç tha ajo, përpjekjet e tyre “për të minuar legjitimitetin dhe funksionalitetin e shtetit të Bosnjës dhe Hercegovinës”.
Sanksionet përfshijnë ngrirjen e aseteve dhe ndalimin e udhëtimit dhe përbëjnë të parat nën regjimin e sanksioneve të Britanisë së Madhe për Bosnjën, tha zyra e jashtme.
Sekretarja e Jashtme britanike Liz Truss tha se Dodik, i cili është anëtari serb i presidencës trepalëshe të Bosnjës, dhe Cvijanoviç, presidentja e entitetit të Republikës Srpska, ishin “inkurajuar” në veprimet e tyre nga presidenti rus Vladimir Putin.
“Këta dy politikanë po minojnë qëllimisht paqen e fituar me vështirësi në Bosnje dhe Hercegovinë”, tha Truss në një deklaratë. “Të inkurajuar nga Putini, sjellja e tyre e pamatur kërcënon stabilitetin dhe sigurinë në të gjithë Ballkanin Perëndimor.”
Dodik dhe partia e tij kanë bërë presion në muajt e fundit për të shkëputur më tej lidhjet midis Republikës Srpska dhe pjesës tjetër të Bosnjës, duke e futur vendin në krizën e tij më të keqe që nga fundi i luftës 1992-1995, në të cilën vdiqën rreth 100,000 njerëz. Dodik ka mbrojtur vazhdimisht shpërbërjen e Bosnjës dhe ka kërcënuar të krijojë një ushtri të veçantë serbe të Bosnjës.
“Veprimet e fundit nga Dodik dhe Cvijanoviç janë në kundërshtim të drejtpërdrejtë me Marrëveshjen e Paqes të Dejtonit dhe kushtetutën e Bosnjës dhe Hercegovinës”, tha ambasadori i Britanisë në Bosnje, Matt Field, në një video-mesazh të shpërndarë në profilin e tij në Tëitter.
Britania tha se Cvijanoviç kishte përdorur pozicionin e saj “për të parashtruar legjislacionin në Republika Srpska që kërkon të transferojë kompetencat shtetërore në nivelin e entitetit”.
Duke iu drejtuar parlamentit të Republikës Srpska pasi mësoi për sanksionet, Dodik tha: “Unë nuk kam asnjë pronë në Mbretërinë e Bashkuar dhe nuk kam qenë atje për 10 vjet”, tha ai.
Vendimi i Britanisë vjen pas atij të Shteteve të Bashkuara, të cilat në janar sanksionuan Dodikun dhe një numër zyrtarësh aktualë dhe ish-zyrtarësh dhe paralajmëruan për veprime të mëtejshme.
