Ambasadorja e Shteteve të Bashkuara në Tiranë, Yuri Kim paralajmëroi të premten ata që ajo i quajti “kundërshtarë” të reformës në drejtësi dhe kërkoi ndaljen e përpjekjeve për minimin e elementëve kyçë të saj, përfshirë edhe procesin e vetingut.
Përmes një mesazhi të postuar në rrjetin social Twitter, ambasadorja Kim foli për një rritje të përpjekjeve për të dëmtuar zbatimin e reformës së fundmi si dhe përfshirje të personave që ajo nuk i identifikoi me emër, në kërcënime, shpifje apo nxitje korruptive.
“Ndërsa reforma në drejtësi po fillon të japë shumë dhe më shumë rezultate, kundërshtarët po shtojnë përpjekjet për të minuar elementet thelbësorë, përfshirë vetingun. Ata që përfshihen në kërcënime, frikësime, shpifje, nxitje për korrupsion, duhet të ndalen,” shkroi ambasadorja Kim.
“Veprimet tuaja nuk janë aq të fshehta sa mendoni,” paralajmëroi ajo.
Mesazhi i fortë i ambasadores amerikane vjen në një kohë kur institucionet e reja të sistemit të drejtësisë janë vendosur shpesh nën akuzë nga përfaqësues të politikës apo aktorë të tjerë, ndërkohë që administrata e presidentit Biden po shton sanksionet si pjesë e luftës së saj kundër korrupsionit.
Në mesazhin e saj, ambasadorja Kim kujtoi gjithashtu se lufta kundër korrupsionit është një interes madhor për sigurinë kombëtare të Shteteve të Bashkuara të Amerikës.
“SHBA do të vazhdojnë ta mbështesë fuqimisht zbatimin e reformës në drejtësi në Shqipëri,” përfundoi ambasadorja e Shteteve të Bashkuara.
