Zyrtarisht Indeksi i Çmimeve të Konsumit të Shqipërisë u rrit me 5.7% në mars të këtij viti, në krahasim me marsin e vitit 2020. Ky duket një inflacion i ulët në krahasim me çfarë po përballen konsumatorët e vendeve të tjera të botës. Fjala vjen, inflacioni në SHBA u rrit me 8.5% në mars ndërsa në Eurozonë, u rrit me 7.5%. Por ndërsa shqiptarët po bëjnë llogaritë me çmimet e rritura, qeveria duket se është në krahun e përfituesve nga kjo dallgë inflacioni. Për shkak se çmimet e lëndëve të para në tregun ndërkombëtar janë rritur me forcë dhe shumica dërrmuese e të ardhurave të qeverisë përbëhen nga taksa mbi mallrat e importuara, qeveria po njeh rrekorde të njëpasnjëshme në të ardhurat buxhetore.
Të dhënat e publikuara nga Ministria e Financave tregojnë se për periudhën janar-mars të këtij viti, të ardhurat totale të buxhetit ishin 139.2 miliardë lekë, afërsisht 30 miliardë lekë më shumë se sa në të njëjtën periudhë të vitit 2021. Në rast se kjo tendencë vijon në pjesën e mbetur të vitit, qeveria pritet të ketë në duar mbi 1 miliardë euro më shumë, shifër kjo përballë të cilës, e ashtuquajtura “paketë” e saj e përbërë nga indeksimi i pensioneve dhe një garanci buxhetore për importin e energjisë elektrike, të ngjajë një asgjë.
Qeveria ndryshoi buxhetin e shtetit të vitit 2022 me një akt normativ në mars, duke ndarë 20 miliardë lekë për të mbuluar koston e rritur të importeve të energjisë elektrike dhe 6 miliardë lekë në ndihmë të familjeve të varfra, një fond të cilit i vuri emrin bombastik “paketa e rezistencës sociale”. Këto të dy ndërhyrje në krahun e shpenzimeve janë më pak se sa të ardhurat shtesë prej 30 miliardë lekësh që buxheti i shtetit ka pasur në periudhën janar-mars.
Fondi prej 26 miliardë lekësh të shpenzimeve shtesë për ndihmë ekonomike dhe energji elektrike do të sigurohej, sipas parashikimeve të qeverisë, përmes rritjes së të ardhurave me 10 miliardë lekë dhe kursimeve në shpenzime operative me 5.8 miliardë dhe të investimeve me afro 10 miliardë të tjera. Siç duket, taksat shtesë që qytetarët kanë paguar për qeverinë për tre muajt e parë të këtij viti, mjaftojnë dhe e tejkalojnë koston vjetore të “paketës së reziztencës sociale” të qeverisë “Rama”.
Rritja kryesore në të ardhurat e qeverisë është në zërin e Tatimit mbi Vlerën e Shtuar me 44%. Ndërsa çmimet e mallrave të rëndësishme janë dyfishuar dhe trefishuar në tregun ndërkombëtar, TVSH, taksat doganore dhe akcizat e paguara për këto mallra janë shtuar gjithashtu. Psh., ndërsa çmimi i vajit të lulediellit është rritur me 2.5 herë në tregun ndërkombëtar ndërsa çmimi i hekurit është rritur me 3 herë. Kjo do të thotë që qeveria po arkëton 2.5 dhe 3 herë më shumë TVSH nga e njëjta sasi malli.
Qeveria nga ana tjetër nuk duket as shumë e interesuar që të shpenzojë, qoftë duke realizuar projektet e investimeve që ajo vetë ka ndërmarrë. Shpenzimet kapitale, termi zyrtar që buxheti përdor për investimet në rrugë, shkolla e të tjera, ishin këtë vit 43% më pak se sa në periudhën janar-mars 2021. Qeveria duket se nuk e ka me ngut as për të ashtuquajturin “Fond Rindërtimi”, i cili duhet t’i ofrojë banesa qytetarëve të mbetur pa strehë nga tërmeti i vitit 2019. Gjatë tremujorit të parë të këtij viti, shpenzimet për fondin e rindërtimit ishin vetëm 9 milionë euro, ose vetëm 6% e planit vjetor. Ato janë edhe 60% më të ulëta se sa në të njëjtin tremujor të vitit të kaluar. Të gjitha tenderët e rindërtimit u bënë, në kundërshtim me këshillën e FMN-së, përmes procedurave të kufizuara, gjë që ul konkurrencën në emër të urgjencës, pra nevojës që punimet të mbarojnë sa më parë dhe banorët që kanë humbur shtëpitë nga tërmeti të rregullohen sa më parë. Por së paku për tremujorin e parë të këtij viti, qeveria dukshëm nuk ka kurrfarë nxitimi për të mbyllur punimet e rindërtimit, në vitin e tretë pas rënies së tërmetit.
