Lideri kryesor i opozitës turke, Kemal Kilicdaroglu, ka dënuar një vendim të gjykatës turke të miratuar nga Ministria turke e Drejtësisë, e cila ia dorëzoi çështjen e vrasjes së Jamal Khashoggi Arabisë Saudite.
Khashoggi u vra nga agjentët sauditë brenda konsullatës saudite në Stamboll në vitin 2018, kur ai vizitoi konsullatën për të rregulluar dokumentet e tij të martesës.
Kilicdaroglu akuzoi presidentin turk Rexhep Tajip Erdogan se i ka vënë “një çmim nderit tonë”.
“Pavarësisht se çfarë besoni, nuk mund t’i vendosni një çmim Jamal Khashoggi, i cili ishte viktimë e një vrasjeje të tmerrshme në tokën tuaj”, tha Kilicdaroglu, presidenti i Partisë Socialdemokrate Republikane Popullore, CHP në një video-mesazh në Tëitter të mërkurën vonë.
Kilicdaroglu tha se vendimi ishte imoral.
“Morali është themeli i shtetit. Ata që varrosën nderin e Turqisë në kopshtin e Ambasadës Saudite, tronditën themelet e shtetit”, shtoi ai.
Të mërkurën, kallëzimi kundër vendimit për transferimin e çështjes, i paraqitur nga e fejuara e Khashoggi, Hatice Cengiz, u refuzua nga Gjykata Administrative e 14-të e Ankarasë.
“Republika e Turqisë nuk mund të heqë dorë nga të drejtat e saj sovrane në një mënyrë të tillë”, kishte kërkuar në apel Gokmen Baspinar, një avokat i Cengiz.
Sipas faqes së internetit T24, e cila ka parë dokumentet e gjykatës, Turqia ia dorëzoi çështjen Khashoggi Arabisë Saudite për “mirësjellje ndërkombëtare”.
Vendimi erdhi në një kohë kur Turqia dëshiron të rindreqë marrëdhëniet me Arabinë Saudite. Erdogani do të vizitojë Arabinë Saudite gjatë Bajramit më 2 maj.
Sipas disa vëzhguesve, parakushti i Arabisë Saudite për këtë përmirësim të marrëdhënieve ishte transferimi i çështjes Khashoggi.
Me miratimin e Ministrisë së Drejtësisë turke, një gjykatë në Stamboll më 7 prill vendosi që çështja të transferohej në Arabinë Saudite.
Në vitin 2019, një gjykatë saudite dënoi pesë burra me vdekje dhe tre të tjerë me burgime të ndryshme për vrasjen e Khashoggi, por dënimet me vdekje u ndryshuan më vonë në dënime me burg pasi djali i Khashoggi i fali vrasësit e babait të tij.
Që nga vrasja dhe një protestë ndërkombëtare, autoritetet saudite kanë pohuar se Khashoggi u vra nga një ekip ekzekutimi pa dijeninë e zyrtarëve të lartë sauditë – një pretendim i hedhur poshtë nga ekspertët dhe organizatat e të drejtave të njeriut.
Vendimi i Turqisë për të dërguar çështjen në Arabinë Saudite tronditi mbrojtësit e të drejtave të njeriut, të cilët thanë se kjo do t’i jepte fund çdo shprese për drejtësi.
