Komisioni i Pavarur i Kualifikimit nuk arriti as këtë të hënë të zhvillonte një seancë dëgjimore me gjyqtaren e Gjykatës së Elbasanit Enkeleda Kapedani. Kapedani, që ishte ftuar në seancën e tretë dëgjimore që prej nëntorit 2021, i kishte dërguar KPK një raport shëndetësor që tregonte pamundësi të paraqitej në seancë.
Trupa e kryesuar nga Genta Tafa Bungo me anëtare Pamela Qirko dhe relatore Brunilda Bekteshi, njoftoi se kishte pranuar kërkesën për të shtyrë seancën, ndërsa ishte marrë vendim që Kapedanit t’i kërkohej të siguronte që të ishte e pranishme ose të përfaqësohej me avokat në seancën e rradhës në datë 16 maj.
Kjo është seanca e tretë dëgjimore ndaj Kapedanit, hetimi ndaj të cilës është rihapur dy herë. Pas dy seancave të para në nëntor 2021 dhe janar 2022, hetimet u hapën sërish pas një gjetje nga Operacioni Ndërkombëtar i Monitorimit.
Pas përfundimit të hetimit KPK njoftoi Kapedanin për seancën e tretë dëgjimore mbi gjetjet e reja, por seanca e lënë në 5 maj dhe ajo e të hënës u shtynë për shkak të raporteve mjekësore nga gjyqtarja.
Kapedani është hetuar në të tri kriteret, ndërsa i janë kërkuar shpjegime për disa transaksione. Prej janarit të këtij viti gjyqtarja është e pezulluar nga Këshilli i Lartë Gjyqësor, pas publikimit të disa videove të saj në rrejtin social Tik-Tok që u konsideruan jo etike.
