Policia e Durrësit njoftoi të dielën arrestimin e 3 personave të dyshuar si përgjegjës për sigurinë dhe kushtet e punës në një kantier ndërtimi ku humbi jetën një 53 vjeçar.
Njoftimi telegrafik i policisë nuk saktësoi datën, orën e ngjarjes, dhe rolin e të arrestuarve, por vetëm njoftoi se dyshohej se burri kishte humbur jetën teksa punonte, si pasojë e moszbatimit të rregullave të sigurisë në punë.
Në një sqarim për BIRN zyrtarisht zëdhënësja për mediat e Drejtorisë së Policisë Durrës sqaroi vetëm se ngjarja kishte ndodhur më datë 7 maj, ditën e shtunë.
BIRN mësoi se ngjarja që ndodhi në lagjen numër 15 ishte në një nga kantieret e ndërtimit për lagjet ku do strehohen të prekurit nga tërmeti i 26 nëntorit 2019, të cilët mbetën pa banesa.
“Momentalisht nuk kemi informacione të tjera përveç asaj që na kanë thënë inxhinierët, ku ndodhi, se ra tek kafazi teksa ishte duke afruar për të shkarkuar tullat”, sqaroi për BIRN një përfaqësues i Inspektoratit Shtetëror të Punës dhe Shërbimeve Shoqërore, në degën e Durrësit.
Përfaqësuesi që kërkoi të mos i përmendej emri tha se ata kishin filluar hetimet për rastin.
“Kemi qenë, kemi hapur 3 çështje sepse janë me nënkontraktorë dhe kjo ngjarje që ka ndodhur është një punonjës i një nënkontraktori aty. I kemi hapur një çështje edhe firmës kryesore, investitorit dhe jemi duke mbledhur informacionet”, sqaroi zyrtari.
Sipas tij ngjarja ndodhi tek kompania që ishte nënkontraktuar për realizimin e muraturës së godinave që po ngrihen në kuadër të procesit të rindërtimit pas tërmetit të nëntorit 2019. Kompanitë e përfshira nuk ishin të arritshme për një koment.
Ndërkohë familjarët e viktimës ngritën dyshime përpara medias paraditen e së hënës, se ngjarja mund të deformohej për të ja lënë fajin viktimës.
“Mbetet për tu parë deri sa të sillet dokumentacioni i plotë nga subjekti. Patjetër që ka qenë i regjistruar sepse vetë subjekti që e ka pasur të punësuar ka bërë njoftimin e aksidentit sipas procedurave ligjore, brenda afatit 24 orë”, u shpreh përfaqësuesi i Inspektoratit të Punës në Durrës.
Ky është aksidenti i dytë i rëndë brenda pak kohësh në Durrës. Në muajin prill policia arrestoi 3 persona pas aksidentimit për vdekje të një 19 vjeçari në Portin e Durrësit, teksa punonte si punëtor ngarkim-shkarkimi në Terminalin e Kontejnerëve.
Ndërtimi bashkë me elektricitetin e minierat janë sektorët me më shumë raste aksidentesh fatale në punë. Në ndërtim në tre vitet e fundit është shënuar numër më i lartë viktimash. Vitin që kaloi 8 punonjës ndërtimi humbën jetën në detyrë sipas Inspektoratit të Punës, shumica pas rënies nga lartësitë.