Kreu i SPAK, Arben Kraja dhe drejtori i Përgjithshëm i Policisë së Shtetit, Gledis Nano njoftuan të enjten rezultatet e hetimit ndaj disa grupeve të krimit të organizuar, që dyshohet të jenë përfshirë në dhjetëra ngjarje të rënda kundër jetës në qytetet e Tiranës, Elbasanit dhe Durrësit.
Gjatë një konference për mediat u bë me dije se ishin firmosur 32 urdhër-arreste për anëtarët e tetë grupeve kriminale, por policia kishte ekzekutuar deri në mesditë vetëm 18 prej tyre.
Dy prej të akuzuarve kryesorë, Suel Çela me aktivitet të dyshuar në Elbasan dhe Ervis Martinaj në Tiranë nuk ishin mes grupit të të arrestuarve,
I pyetur në konferencë se pse nuk ishin ekzekutuar urdhër-arrestet për Çelën dhe Martinajn, kreu i SPAK, Arben Kraja tha se operacioni ishte në vazhdim dhe refuzoi të komentonte për emra të veçantë.
Hetimi për operacionin e koduar “Golden Bullet” filloi më 14 prill, rreth dy javë pas ndalimit në Fier të të shumëkërkuarit Nuredin Dumani, i dyshuar për kryerjen e disa vrasjeve. Ky i fundit u ndalua më 29 mars, disa orë pasi iu bë atentat në aksin rrugor Elbasan-Cërrik ku dhe mbeti i plagosur.
“Janë zbuluar të dhëna të rëndësishme lidhur me disa vrasje të kryera në bashkëpunim të veçantë, atë të grupit të strukturuar kriminal, vrasje të mbetura në tentativë, krijimi i kushteve dhe mjeteve materiale për të kryer vrasje, vjedhje me dhunë dhe armë, vepra dhune, shkatërrim prone me lëndë plasëse,” deklaroi Kraja.
Ai shtoi se SPAK ka tërhequr dhe studiuar dosjet e 18 procedimeve penale që kanë të bëjnë me këto ngjarje që janë bashkuar në një hetim të vetëm, si dhe janë siguruar të dhëna në drejtim të identifikimit të autorëve.
“Ajo që është karakteristikë për këta grupe kriminale është dhuna e egër e treguar në kryerjen e krimeve, si dhe pasojat shumë të rënda të ardhura nga kjo veprimtari kriminale,” pohoi Kraja dhe theksoi se hetimi nga nxjerr në pah se këto grupe kriminale ishin në gjendje të paguanin shuma të mëdha parash për vrasjen e personave të cilët ata i konsideronin kundërshtarë.
Sipas SPAK, ka pasur raste kur pjesëtarë të një grupi kriminal bashkëpunojnë me grupe të tjera që janë kundërshtarë me njërj-tjetrin. Mënyra e kryerjes së veprave penale u konsiderua e një shkalle shumë të lartë organizimi dhe me shkallë shumë të lartë rrezikshmërie shoqërore.
Në funksion të këtij hetimi, Gjykata e Posaçme e Shkallës së Parë për Korrupsionin dhe Krimin e Organizuar ka caktuar masat e sigurimit “arrest në burg” për 32 persona, si dhe është autorizuar kontrolli i banesës dhe vendeve në pronësi të 28 prej tyre.
Drejtori i Policisë, Gledis Nano sqaroi se operacionin për kapjen e 32 të akuzuarve është shtrirë në qarqet e Tiranës, Durrësit, Elbasanit dhe Lezhës dhe janë përfshirë forcat e RENEA-s, të FNSH-së si dhe të strukturave të tjera të posaçme në Policinë e Shtetit.
Mes 18 urdhër-arresteve të ekzekutuara, nëntë prej personave gjendeshin aktualisht në burg të arrestuar për vepra të tjera penale. Mes të arrestuarve gjendet edhe një punonjës i policisë, i cili sipas Krajës është proceduar për shpërdorim detyre.
Sipas SPAK dhe policisë, operacioni për ndalimin e 14 personave të tjerë është duke vijuar.
Kraja mohoi që firot e operacionit për arrestimin e personave ndaj të cilëve është caktuar masë sigurie “arrest në burg”, të jenë rrjedhojë e dekonspirimit. Ai u shpreh i sigurtë se “nuk ka pasur dekonspirim”.
Gjatë kontrollit të banesave dhe hoteleve janë sekuestruar 3 armë zjarri, 2 antiplumb si ato që përdor Policia e Shtetit, municion luftarak, rreth 17 mijë euro, aparate celularë, fatura bankare, automjete dhe sende të tjera që konsiderohen të përfituara nga veprimtaria kriminale.
Të ndaluar gjatë operacionit:
Ardjan Uzuni, 56 vjeç
Leonard Palushi, 41 vjeç
Gentian Sharra, 48 vjeç
Fatos Gosa, 54 vjeç
Florenc Çekrezi, 35 vjeç
Petrit Qoli, 51 vjeç
Agron Qoli, 52 vjeç
Agron Qafa, 48 vjeç
Asllan Plaku, 30 vjeç
Të akuzuarit në burgje:
Nuredin Dumani, 35 vjeç
Henrik Hoxhaj, 40 vjeç
Altin Ndoci, 35 vjeç
Erion (Andrea) Alibej, 36 vjeç
Skerdi Tasi, 31 vjeç
Elvis Koçi (Çaushllari), 30 vjeç
Ilirian Feci, 47 vjeç
Enver Diva, 43 vjeç
Besjan Xhixha, 31 vjeç