Tentativat për një konsensus mes mazhorancës dhe opozitës për të pasur një proces normal të zgjedhjes së Presidentit të ri dështuan duke çuar në djegien e raundit të dytë të votimit pa asnjë kandidat zyrtar.
Të hënën në darkë pas një seance të gjatë debatesh deputetët e quajtën të ezauruar raundin kushtetues, ndërsa procesi do të vijojë me raundin tjetër pas 7 ditësh.
Deputeti Eduard Ndreca, në cilësinë e relatorit, paraqiti përpara Kuvendit raportin e miratuar nga Komisioni i Ligjeve ku thuhej se “nuk është paraqitur asnjë kandidaturë brenda afateve ligjore të përcaktuara, çka bën që votimi i dytë i zgjedhjes së Presidentit të kalojë pa asnjë emër dhe pa votim”.
Kryeministri Edi Rama tha pas seancës se opozita nuk ishte përfshirë në proces. “Duhen dy për tango thonë, kështu që që nuk mund të bëjmë tango vetëm. S’kemi partnerë”- u shpreh Rama i pyetur nga gazetarët nëse mazhoranca kishte ndërmend të digjte dhe raundin e tretë pa kandidat.
Duke iu referuar politikës si një lojë shahu ndërsa i kërkoi opozitës që të mos ishte imponuese në këtë proces. “Opozita nuk është aty për të imponuar; o kështu siç them unë o s’ka, opozita është aty për të bërë përpjekjet e veta siç i kemi bërë ne”- u shpreh ai.
Mazhoranca dhe opozita u ulën në një tryezë bisedimesh gjatë javës që shkoi dhe ranë dakord që opozita të kishte të drejtën eskluzive të propozimeve të kandidatëve në raundin e dytë dhe të tretë, të cilët kërkojnë një shumicë të cilësuar votash.
Por dakordësia u prish shpejt, pasi një pjesë e grupit parlamentar të Partisë Demokratike, që nuk kontrollohet nga ish-kryeministri Sali Berisha, propozoi një dyzinë emrash duke i kërkuar mazhorancës të zgjedhë njërin prej tyre.
Propozimet nuk u pranuan nga Partia Socialiste, e cila po pret raundet e fundit për të zgjedhur presidentin me vetëm me votat e saj. Një kandidaturë që të pranohet duhet të propozohet nga 20 deputetë të Kuvendit.
Ndërsa tre raundet e para imponojnë një president konsensual mes palëve që kërkon 94 apo 84 vota, në raundin e katërt e të pestë mazhoranca mund ta zgjedhë presidentin me shumicë të thjeshtë prej 71 votash.
