Komisioni Parlamentar i Ligjeve përzgjodhi me votim të premten kandidatët për Bordin Drejtues të Autoritetit të Dosjeve, duke kaluar me votat e shumicës 4 emra, në një proces votimi që u kontestua nga opozita.
Nga 11 kandidatë, vetëm 6 prej tyre ishin kualifikuar si kandidatë zyrtarë duke marrë mbështetjen me firmat e 28 deputetëve dhe 1 kandidat i ardhur si propozim i kryeministrit. Mazhoranca kaloi 4 emra për votim në seancë plenare, edhe pse bordi përbëhet nga 5 anëtarë.
Deputetët socialistë votuan drejtuesen aktuale të Autoritetit, Gentiana Sula, ish-anëtarin tjetër të bordit, Altin Sula si dhe Albert Nikollën, i propozuar nga kryeministri Edi Rama. Deputetët e opozitës nuk morën pjesë në votim për këta emra.
Kandidatura e katërt e votuar, Simon Mirakaj vinte si propozim nga shoqatat e ish-të përndjekurve politikë dhe ishte mbështetur me firma edhe nga deputetët e Partisë Demokratike.
Socialistët votuan kundër Skënder Vrionit, i propozuar nga shoqatat e të drejtave të njeriut si dhe ndaj Besim Ndregjonit, Gjergj Markut dhe Marcel Hilës.
Opozita e kundërshtoi si antiligjore rrëzimin e kandidaturave të tjera, që sipas tyre i plotësonin kriteret ligjore dhe kontestuan procesin e votimit.
Rrëzimi i Vrionit u cilësua si “pacipësi ligjore” nga Enkelejd Alibeaj, duke shtuar se rrëzimi i të vetmes kandidaturë nga shoqatat e të drejtave të njeriut u bë pa asnjë argument.
“ Ligji e thotë qartë se dy propozime bëhen nga Kuvendi, 1 nga kryeministri, 1 nga shoqatat e të përndjekurve dhe 1 nga shoqatat e mbrojtjes së drejtave të njeriut,” tha Alibeaj.
“Autoriteti duhet të jetë jashtë kthetrave të politikës,” u tha ai kolegëve socialistë duke i akuzuar se “po kërkoni ta rrëmbeni të gjithin, kur më parë ishte raporti 3 me 2”.
Sipas demokratëve, edhe votimi për Ndregjonin u manipulua, pasi fillimisht socialistët nuk morën pjesë në votim, por pasi emri i tij mund të kalonte me votat pro të opozitës, ata ngritën duart kundër.
Deputeti Oerd Bylykbashi kërkoi që në nisje që procesi i përzgjedhjes t’i shërbente qëllimit pse ishte ngritur ai institucion, duke u dhënë më shumë hapësirë emrave që vinin nga kategoria e ish të përndjekurve politikë. “Të mos jenë kandidatura që u japin ju mazhorancën për t’i mbyllur gojën këtij autoriteti dhe për një mandat tjetër,” tha Bylykbashi duke e lidhur këtë me nevojën që ka shoqëria për ndarjen nga e shkuara.
Deputetët u përfshinë në debate politike për pastërtinë e figurës së tyre apo rolin që kanë luajtur grupimet politike në raport me viktimat e komunizmit.
Socialisti Xhemal Qefalia u kërkoi demokratëve të nxjerrin dokumentin e pastërtisë së figurës, që s’kanë pasur lidhje me ish Sigurimin e Shtetit gjatë komunizmit, ndërsa deputetja Dhurata Çupi propozoi që të gjithë deputetëve t’u kërkohej dhe t’u bëhej publike çertifikata e pastërtisë së figurës.
Mandati i Bordit të AIDSSH-së ka përfunduar që në muajin dhjetor dhe pothuaj gjatë gjithë mandatit të parë kishte funksionuar në mungesë të një anëtari pas dorëheqjes së Daut Gumenit në vitin 2018. Kuvendi mbajti disa vite peng kandidaturën e Besim Ndregjonit, propozim i ardhur nga shoqatat e të përndjekurve për këtë bord.
