Gjyqtari Sokol Ngresi u dekretua të premten nga Presidenti i Republikës Ilir Meta si anëtarë i Gjykatës së Lartë, pas propozimit nga Këshilli i Lartë Gjyqësor.
Dekretimi i Ngresit, i cili bëhet anëtari i 13 i gjykatës nga 19 që ajo duhet të ketë, kthen për herë të parë pas mbi 5 vjetësh në funksionalitet të plotë Gjykatën e Lartë, e cila qe jofunksionale pas një sërë dorëheqjesh dhe shkarkimesh nga procesi i vetingut.
Dekreti u përshëndet nga Ambasadorja e SHBA në Tiranë Yuri Kim, e cila e cilësoi emërimin si “hap të madh për para për reformën në drejtësi” në një status në Twitter. Kim kishte bërë edhe më herët thirrje për të plotësuar vendet vakante në Gjykatën e Lartë dhe vlerësoi të premten bashkëpunimin mes presidencës dhe KLGJ-së për plotësimin e vakancave.
Ngresi e pati shprehur dëshirën për të qenë anëtar i Gjykatës së Lartë herët. Ai iu nënshtrua rivlerësimit me përparësi, por edhe pse u konfirmua në Komisionin e Pavarur të Kualifikimit çështja ndaj tij u ankimua dhe ai u konfirmua në detyrë me vendim të formës së prerë vetëm pas rishqyrtimit të çështjes në Kolegjin e Posaçëm të Apelimit.
