Drejtori i Administratës së Zonave të Mbrojtura në Lezhë u arrestua të premten bashkë me dy vartës të tij, pasi prokuroria ka ngritur ndaj tyre akuzën e shpërdorimit të detyrës. Policia e Lezhës njoftoi se kishte bërë ekzekutimin e vendimit të gjykatës dhe vënë në arrest
Policia e Lezhës njoftoi të premten se kishte zbatuar vendimin e Gjykatës së Shkallës së Parë dhe arrestuar Pjetër Tonin, 61 vjeç, me detyrë drejtor i AdZM Lezhë dhe dy vartësit e tij Armando Lleshaj, 27 vjeç specialist monitorimi dhe Tom Gjelaj, 63 vjeç, roje mjedisore. Ndërkohë Pashk Ndoka, 61 vjeç, përgjegjës në sektorin e monitorimit të AdZM-së në Lezhë u shpall në kërkim.
Policia thotë në njoftim se çështja ishte hetuar nga specialistët për “Hetimin e Krimit Ekonomik dhe Financiar në DVP Lezhë, bazuar në informacionet e siguruara se në zonën e mbrojtur “Laguna Kune-Vain” po kryhej veprimtari e paligjshme”.
Të arrestuarit sipas policisë nuk kanë përmbushur detyrat funksionale dhe kishin lejuar “dëmtimin e zonës së mbrojtur të Kune – Vainit, konkretisht në vendin e quajtur “Grykëderdhja e Matkeqës”.
BIRN mësoi se nga hetimet ka rezultuar që në zonën e mbrojtur janë hedhur inerte për ta kthyer atë në tokë dhe po ashtu ka pasur përpjekje për tjetërsimin e saj. Policia e Lezhës procedoi penalisht në nëntor të vitit që shkoi tre persona për hedhje të inerteve në lagunë.
