Tre organizatat mjedisore të rajonit të Mesdheut – “Medasset”, Fondacioni për Natyrën MAVA, dhe Organizata për Ruajtjen e Breshkave të Detit në Rajonin e Mesdheut – përçuan nëpërmjet një konference për shtyp rëndësinë e monitorimit dhe ruajtjes së habitateve të breshkave të bregdetit në Mesdhe.
“Aktualisht një kontribut të madh për monitorimin në terren të bregdetit dhe breshkave detare po e jep Agjensia Kombëtare e Zonave të Mbrojtura nëpërmjet Administratave Rajonale të saj në Vlorë, Fier, Durrës, Lezhë dhe Shkodër”, shpjegoi Dr. Enerit Saçdanaku, përsa i përket rolit të Shqipërisë në këtë aksion.
“Ata janë pothuajse çdo ditë në terren dhe monitorimi i plazheve me qëllim identifikimin e folezimeve të mundshme të breshkave detare në sezonin e riprodhimit është një kontribut mjaft i rëndësishëm në përpjekjen e madhe që bëhet për të monitoruar të gjithë bregdetin shqiptar” vijoi Saçdanaku, në konferencën për shtyp.
Organizata mjedisore MEDASSET së bashku me Dr. Enerit Saçdanaku përgatitën një paketë trajnimi mbi Shkencën Qytetare, si pjesë e aktiviteteve të projektit të ndërmarra në Shqipëri, financuar nga Fondacioni MAVA.
Tre nga shtatë llojet e breshkave të detit takohen në Mesdhe, prandaj ky rajon përbën një rëndësi të madhe në ruajtjen e tyre.
“Ujërat e bregdetit shqiptar konsiderohen si një habitat mjaft i rëndësishëm për ushqimin dhe dimërimin e breshkave të detit , ndërsa folezimet sporadike janë të pranishme përgjatë gjithë bregdetit prej rreth 435km”, citon deklarata për shtyp e mjedisorëve.
Sipas ekspertëve mjedisorë, foleja e parë e breshkave të detit e regjistruar zyrtarisht në Shqipëri ishte ajo e vitit 2018 në Divjakë.
Për të ruajtur rolin e bregdetit shqiptar në vijueshmërinë e kësaj specie, kjo paketë trajnimi e ndërrmarë nga aktivistët mjedisorë, synon të rrisë ndërgjegjësimin publik mbi praninë e breshkave detare si dhe të folezimeve të tyre të mundshme përgjatë bregdetit shqiptar.
“Në fund të fundit, të gjithë mund të kontribuojmë në monitoriin dhe mbrojtjen e këtyre krijesave antike detare”, shkruajnë aktivistët në konferencën për shtyp.
