Në mbledhjen e vet të dytë, Komisioni i Posaçëm Parlamentar për reformën administrativo-territoriale vendosi t’i kërkojë Kuvendit shtyrje të afatit të punës deri në fund të shtatorit.
Bashkëkryetaret e komisionit, Anila Denaj nga PS dhe Dhurata Çupi nga PD ishin në dakordësi për këtë kërkesë, pasi sipas tyre afati i paracaktuar nga Kuvendi në vendimin e ngritjes së këtij komisioni skadon më datë 10 gusht.
Sipas tyre është një kohë e pamjaftueshme për të realizuar planin e punës, ndërsa që nga data 10 shkurt, kur u Kuvendi votoi ngritjen e këtij komisioni, grupet parlamentare vonuan pa ndonjë arsye objektive propozimet për anëtarët e tij.
Në mbledhjen e së mërkurës, palët miratuan me konsensus dhe planin e punës që parashikon seanca dëgjimore me përfaqësuesit e institucioneve, të pushtetit vendor, organizatave ndërkombëtare, botën akademike, organizatat jofitimprurëse dhe aktorë të tjerë.
Në bazë të vlerësimeve të ekspertëve të zgjedhur nga partitë dhe atyre ndërkombëtarë që do të asistojnë punën e komisionit do të miratohen kriteret teknike për ndarjen e re administrativo-territoriale dhe do të paraqiten propozimet për ndarjen e re administrativo-territoriale.
Sipas planit, shqyrtimi i propozimeve dhe miratimi i projekt-hartës për ndarjen e re territoriale do të bëhet nga komisioni dhe më pas do t’u dërgohet për mendim të gjitha grupeve të interesit.
Në fazën e fundit, projekti i komisionit do të kthehet në një projektligj për ndarjen e re administrativo-territoriale që sipas planit të miratuar nga komisionit pritet të miratohet në Kuvend deri në fund të shtatorit.
Kërkesa për rishikim të hartës erdhi nga ana e opozitës, e cila pretendon se reforma e bërë në vitin 2014 nuk ka arritur të jetë efektive për qytetarët.
Në atë kohë një komision i ngjashëm i përbashkët nuk arriti dot të miratojë me konsensus hartën e re territoriale, e cila përcaktoi 61 bashkitë e vendit. Harta u votua me votat e socialistëve në pushtet dhe votat e partive të vogla aleate PDIU e LSI, ndërsa Partia Demokratike votoi kundër.
