Projektligji “Për Urdhrin Profesional të Inxhinierëve” i sjellë në Kuvend me propozim të deputetes Luljeta Bozo është kundërshtuar nga një pjesë e komunitetit të inxhinerëve. Dhjetra inxhinerë dolën në protestë para kryesisë së Kuvendit të mërkurën, ndërkohë që një përfaqësi e tyre ishte thirrur në një seancë dëgjimore në Komisionin për Veprimtaritë Prodhuese, Tregtinë dhe Mjedisin.
Arkitekti Gjegji Caca i tha BIRN-it se kishte dalë në protestë për të kundërshtuar një projektligj “klientelist dhe jo transparent”.
“Ky projekt kërkon të kalojë liçensimin e profesionit tonë nga entiteti shtetëror në dorën e një grupi njerëzish që do të drejtojnë urdhërin. Profesioni ynë është i rregulluar me ligjin për profesionet e rregullura dhe nuk mund të pranojmë të dalë një grup njerëzish të vendosë si dhe kur duhet ta ushtrojmë profesionin tonë.”- tha ai.
Protestën e mbështeti dhe deputeti i PD-së, Lefter Gështenja, i cili tha se kishte dalë krah kolegëve të tij inxhinierë. “Ky projektligj është konçensionar, pasi i jep një grupimi të caktuar të drejtën për të liçensuar inxhinierët”- tha ai.
Ndërkohë inxhinerja Dëshira Mena i parashtroi argumentet para deputetëve dhe u kërkoi atyre që të mos e miratojnë pasi kundërshtohet në masë nga inxhinerët dhe nuk i përfaqëson ata dhe bie në kundërshtim me Kushtetutën.
Mena tha projekti fillimisht ka qenë ide e ministrisë së Infrastrukturës dhe Energjisë dhe kjo ministri nuk ka qënë transparente.
“Janë 700 firma inxhinerësh dhe ministria nuk na hapi derën duke u sjellë në mënyrë dekurajuese dhe arrogante me ne”- tha ajo.
Mena pretendoi se grupi nismëtar ku përfshihen 11 shoqata të inxhinerëve përfaqëson në fakt një minorancë të komunitetit dhe ka hartuar një draft që do t’u shërbejë vetëm atyre. “Kjo quhet dhunë me ligj për të vendosur pushtet mbi profesionin e inxhinierit”- i tha ajo komisionit.
Kryetari i komisionit Arben Pëllumbi këmbënguli në pyetjen nëse duhet apo jo një urdhër inxhinieri dhe u mundua të qetësonte të pranishmit se qëllimi i komisionit ishte për të gjetur zgjidhjen më të mirë për komunitetin. “Kemi 13 vite që e diskutojmë këtë dhe nuk arrihet në asnjë lloj konkluzioni. T’i dëgjojmë të gjithë palët dhe të dalim në një përfundim nëse duhet apo jo një urdhër inxhinieri”- tha ai.
Për të mos krijuar debat dhe përplasje mes inxhinerërëve Pëllumbi shtyu seancën dëgjimore me përfaqësuesit e grupit nismëtar të projekligjit.
Në realicionin shoqërues të projektit, deputetja Bozdo, një inxhiniere ndërtimi në pension, shkruan se ka marrë miratimin e shoqatave inxhinierike për draftin dhe cilëson projektin si një nevojë për të mbushur vakuumin ligjor të profesioneve të rregulluara.
Projekligji parashikon zhvendosjen nga administrata publike tek mekanizmi i ri i “Urdhrit Profesional të Inxhinierit” të përgjegjësisë për rregullimin e profesionit të inxhinierit.
