Numri i rasteve të reja me COVID-19 shënoi 974 vetë të martën, shifra më e lartë që nga shkurti i këtij viti, ndërsa dy qytetarë të tjerë humbën jetën nga sëmundja që po kthehet me forcë në Shqipëri dhe në shumë vende të tjera të Evropës pas heqjes së kufizimeve mbi udhëtimet në fillim të verës. Aktualisht ka 4235 të sëmurë me COVID dhe sipas Institutit të Shëndetit Publik, virusi njihet se qarkullon në mbi 90% të bashkive të vendit.
Megjithatë, komiteti që menaxhon pandeminë, deklaroi të mërkurën se për momentin nuk do të ketë masa kufizuese ndërsa ndërhyrjet do të mjaftohen me rekomandimin për vaksinim. Sipas profesoreshës Silva Bino nga Instituti i Shëndetit Publik, aktualisht sot vetëm 46% e popullsisë është e vaksinuar me dy doza ndërsa tendenca e muajve të fundit ka qenë pakësim i mëtejshëm i personave të gatshëm për t’u vaksinuar. Vetëm 10% e popullsisë është e vaksinuar me tre doza.
Lajmi pozitiv duket se është se pjesa më e rrezikuar e popullsisë, të moshuarit, kanë një normë vaksinimi më të lartë. Por edhe këtu, shumica vijon të mos ketë mbrojtjen maksimale.
“Për grupmoshën mbi 60 vjec me tre doza mbetet në 35 për qind,” deklaroi Bino.
Të rinjtë nën 30 vjeç kanë një mbulesë me vaksina prej më pak se 30%.
“Është emergjencë për moshat e thyera të bëjnë dozën e tretë,” shtoi Bino.
COVID-19 po rikthehet në të gjithë kontinentinn Evropian. Sipas të dhënave të Reuters, Franca, Gjermania dhe Italia janë nga vendet me numrin më të lartë të infektimeve në botë ndërsa fqinji tjetër i Shqipërisë, Greqia, numëroi 30 mijë raste të reja të martën, nga të cilat, 5 mijë ishin infektime për herë të dytë dhe 25 mijë, infektime të reja.
