Policia e Dibrës njoftoi të martën se një minator rreth 52 vjeç ishte vrarë gjatë punës në një prej galerive të nxjerrjes së kromit në Bulqizë.
“Në një subjekt minerar në Bulqizë, dyshohet se gjatë punës është aksidentuar me pasojë vdekjen shtetasi S. D., rreth 52 vjeç,(minator)”, njoftoi policia.
Policia bëri me dije se rrethanat e aksidentit ishin ende të paqarta dhe se një grup pune ishte ngritur për të hetuar ngjarjen. Por ndërsa ka publikuar të dhënat shkurt për aksidentin, policia nuk ka bërë publik as vendin ku ai ka ndodhur dhe as kompaninë për të cilën punonte minatori, që u identifikua si Sazan Deda.
Në një reagim në Facebook Sindikata e Minatorëve të Bashkuar të Bulqizës bëri thirrje për hetimin e ngjarjes, ndërsa vuri në dukje se policia nuk kishte dhënë informacion për kompaninë në të cilën kishte ndodhur aksidenti.
“U shprehim familjarëve të kolegut dhe shokut tonë Sazan Deda ngushëllimet për humbjen e rëndë. Kërkojmë nga organet shtetërore hetime për aksidentin dhe përgjegjësit për ndodhjen e tij, si dhe kontrolle të rrepta në çdo minierë për kushtet e sigurisë në punë”, thuhet në reagim.
Galeritë e Bulqizës janë një prej zonave me më shumë aksidente të rënda në punë në Shqipëri, sipas të dhënave nga Inspektorati i Punës. Vitin e kaluar në miniera e karriera u aksidentuan 28 persona, 6 prej të cilëve humbën jetën.
