Një grup deputetësh të PD-së njoftuan të enjten se kishin depozituar pranë Prokurorit të Përgjithshëm një kërkesë për zbatimin e ligjit të dekriminalizimit për kryetarin e Bashkisë Divjakë me pretendimin se ai është i dënuar për trafik të qenieve njerëzore në Itali.
“Nga të dhëna të bëra publike më parë, ekziston dyshimi i arsyeshëm se subjekti Fredi Kokoneshi, ndodhet në kushtet e ndalimit për të kandiduar dhe për t’u zgjedhur në një funksion të lartë publik. Kryetari i Bashkisë Divjakë ka kryer trafik të qënieve njerëzore dhe veprimtari të paligjshme të lidhura me prostitucionin në Milano dhe për pasojë, ai ka qenë i arrestuar nga Policia Italiane dhe i dënuar me burg” – thuhet në kërkesën e firmosur nga 15 deputetë.
Kryebashkiaku socialist Fredi Kokoneshi e cilësoi sulm të nxitur nga interesa private dhe tha se emri i tij ishte verifikuar më parë, verifikim nga i cili kishte rezultuar i pastër.
“Unë jam verifikuar pas një kërkese të deputetëve të PD-së në legjislaturën e kaluar dhe kam dalë i pastër. Nuk ka ndaj meje asnjë lloj dënimi, qoftë dhe administrativ”- tha ai.
Kokoneshi i vuri BIRN-it në dispozicion dokumentet e vitit 2019 të prokurorisë dhe Komisionit Qendror të Zgjedhjeve për pastërtinë e figurës së tij.
Në një dokument të firmosur nga Arben Kraja, në atë kohë prokuror në Prokurorinë e Përgjithshme thuhet se nga verifikimet e bëra brenda Shqipërisë dhe në shtetin fqinj Kokoneshi nuk rezultonte i dënuar më parë, dhe nuk kishte qenë ndonjëherë nën hetim apo i ndaluar nga organet ligjzbatuese.
Por, deputeti Gazmend Bardhi, iniciator i kërkesës i tha BIRN-it se përgjigjen për pretendimet e ngritura në kërkesë “do ta jepte prokuroria”.
Kokoneshi pretendoi gjithashtu se kërkesa e demokratëve është nxitur nga një konflikt mes bashkisë që ai drejton dhe një biznesmeni në zonën e Divjakës, anëtar i organeve drejtuese të PD-së, konflitk që sipas tij po hetohej nga policia vendore. “Ky është shantazh”- tha ai.
Për shkak të ligjit të dekriminalizimit, pas denoncimeve të PD-së, janë larguar nga detyra dy kryetarë bashkish të PS-së të zgjedhur në zgjedhjet e fundit vendore 2019, ai i Shkodrës Valdrin Pjetri dhe i Vorës, Agim Kajmaku.
