Gjykata e Posaçme caktoi të premten masë sigurie arresti në shtëpi për gjyqtaren e Elbasanit Zamira Vyshka, pas kërkesës së SPAK që akuzon atë dhe katër persona të tjerë të përfshirë në një aferë korruptive.
“Fakti penal i hetuar, lidhet me një rast të korrupsionit aktiv/pasiv në sistemin e drejtësisë (në qytetin e Elbasanit), ku persona të interesuar/familjarë të një shtetasi të arrestuar në bashkëpunim me avokatin mbrojtës, i kanë ofruar gjyqtarit të çështjes një shumë monetare me qëllim favorizim në caktimin e masës së dënimit”, thuhet në njoftim për shtyp të SPAK.
Gjykata po ashtu caktoi masë sigurimi arresti me burg për avokatit Ilir Pashaj, i cili më herët ka shërbyer si gjyqtar në Gjykatën e Elbasanit. 2 persona të tjerë të përfshirë në këtë çështje po ashtu u caktuan me masë sigurie arresti në burg, ndërsa një i 5 u la me masën e sigurisë arresti në shtëpi.
SPAk i akuzon të arrestuarit për “Korrupsioni aktiv të gjyqtarit, prokurorit dhe funksionarëve të tjerë të drejtësisë”, në bashkëpunim, parashikuar nga nenet 319 dhe 25 të Kodit Penal, “Korrupsionit pasiv i gjyqtarit, prokurorit dhe funksionarëve të tjerë të drejtësisë”, parashikuar nga nenet 319/ç të Kodit Penal, si dhe “Moskallëzimi i krimit”, parashikuar nga neni 300 i Kodit Penal”.
