Prokuroria e Tiranës ka regjistruar procedim penal ndaj kryesekretares së këtij institucioni, e cila akuzohet se ka dekonspiruar një hetim ndaj punonjësve të Drejtorisë së Përgjithshme të Shërbimit të Transportit Rrugor, DPSHTRR.
Zyrtarët e DPSHTRR po hetohen nga Prokuroria e Tiranës për veprën penale të “shpërdorimit të detyrës”. Çështja e tyre mbërriti në prokurorinë e kryeqytetit një vit më parë, pasi u transferua për kompetencë nga Prokuroria e Posaçme Kundër Korrupsionit dhe Krimit të Organizuar, SPAK.
Hetimi për kryesekretaren e Prokurorisë së Tiranës, Rajana Jata po kryhet nga shefi i kësaj prokurorie, Arenc Çela, i cili kërkoi në gjykatë caktimin e masës së sigurisë “detyrim për paraqitje” dhe “pezullim nga detyra”.
“Ka dyshime që në momentin që ka mbërritur dosja, është dekonspiruar”, tha Çela për BIRN, ndërsa shtoi se gjykata i kishte miratuar kërkesat e tij për masë sigurie.
Jata refuzoi të komentonte lidhur me akuzën apo masën e sigurisë së caktuar ndaj saj.
“Pas dhënies së vendimit të formës së prerë nga gjykata, do të mbaj qëndrimin tim,” tha Jata në një komunikim telefonik me BIRN.
BIRN mësoi se Jata akuzohet se kishte njoftuar njërin prej zyrtarëve të Transportit Rrugor për mbërritjen në Prokurorinë e Tiranës të një materiali hetimor në adresë të tij. Në atë kohë, zyrtarët e DPSHTRR ishin nën hetim dhe përgjim.
Ndërkohë, hetimi ndaj kryesekretares është regjistruar rreth 1 muaj e gjysmë më parë për veprën penale “zbulimi i akteve ose të dhënave sekrete”.