Rreth 1 ton marijuanë u sekuestrua të dielën në det të hapur gjatë një operacioni të përbashkët mes Drejtorisë së Policisë së Vlorës dhe Guardia di Finanza-s, në përpjekjen për t’u trafikuar nga Shqipëria drejt Italisë nga dy shtetas ukrainas.
Drejtori i Policisë së Vlorës, Gentian Berberi tha të hënën në një konferencë për shtyp në prani të prokurorit dhe kolegëve italianë se si rezultat i operacionit ndërkombëtar të koduar “Syri” ishin arrestuar tre shtetas shqiptarë, dy shtetas ukrainas si dhe ishin sekuestruar katër mjete lundruese të përfshira në rastin e trafikimit.
“Në operacion u përshinë rreth 250 forca policore, të cilat zhvilluan kontrolle dhe ndjekje nga toka, deti dhe nga ajri me helikopter të GDF-së dhe Frontex-it,” tha Berberi gjatë konferencës për shtyp.
“Nga shërbimet e Policisë së Shtetit u bë i mundur identifikimi i personave që dyshohet se kishin transportuar lëndën narkotike me 3 mjete lundruese, drejt një mjeti tjetër lundrues në thellësi të detit,” shtoi ai.
Policia e Vlorës arrestoi Arbër Saraselin, 31 vjeç, Saverjo Imerajn, 22 vjeç dhe Qemal Pekmezin, 19 vjeç si dhe shpalli në kërkim shtetasin Gregor Likaj me akuzën e përfshirjes në trafikimin e lëndës narkotike.
Gjithashtu, Guardia di Finanza arrestoi në flagrancë në ujërat italiane dy shtetasit ukrainas si dhe sekuestroi skafin dhe lëndën narkotike.
Sipas kreut të policisë së Vlorës, shtetasit e arrestuar në Vlorë dyshohet se kanë transportuar marijuanën pasditen e së dielës me 3 skafe në thellësi të ujërave të detit Jon dhe e kanë dorëzuar atë te mjeti lundrues i drejtuar nga dy shtetasit ukrainas.
Shërbimet e GDF-së, gjatë kontrollit në bordin e mjetit lundrues, kanë sekuestruar një sasi prej 992 kg lëndë të dyshuar narkotike marijuanë, e ndarë në 153 pako.
