Gjykata e Kurbinit la me masë sigurie arresti me burg oficerin e policisë të Forcës së Posaccme Operacionale Jeton Lami, i cili akuzohet për shpërdorim detyre për shkak se është filmuar duke shoqëruar Ervis Martinajn në një kohë kur ky i fundit ishte i shpallur në kërkim.
Gjyqtari Aurel Arapi pranoi kërkesën e prokurorit Bardhyl Shehu në caktimin e masës së sigurisë. Ndërkohë avokati i të akuzuarit Gentjan Rumano tha se do të ankohej për masën në gjykatën e Apelit, por shtoi për mediat se rrethanat në të cilat akuzohej klienti i tij ishin të paqarta.
“Qëndrimi jonë në seancë ka qenë vetëm në lidhje me kushtet e dhënies se masës së sigurimit. Lidhur me rrethanat e tjera do sqarohen gjatë hetimit”, tha Rumano.
Agjenti i Forcës së Posaçme Operacionale në Policinë e Shtetit Jeton Lami, u arrestua të martën, pasi gjatë hetimeve të nisura nga prokuroria e Kurbinit mbi dyshimet e rrëmbimit e të kërkuarit Ervis Martinaj, u gjet se oficeri i policisë e kishte transportuar atë me makinë.
BIRN mësoi se oficeri rezulton i shoqëruar me Martinaj në kamerat e një hoteli në Durrës në mbrëmjen e 5 gushtit dhe po ashtu shihet në mëngjes në të njëjtat kamera.
Ervis Martinaj, u dënua në prill të vitit të kaluar nga Gjykata e Tiranës me 3 vite e 8 muaj burg, për akuzat e organizimit të lojërave të fati, falsifikim dhe fshehje të ardhurash, sigurim të kushteve për të kryer të vrasjeve. Por Martinaj, i cili u arrestua në tetor 2018 ndërsa mjekohej për plagët e marra pas një përplasje me armë në një lokal në ish-bllok në të cilën mbeti i vrarë Fabiol Gaxha dhe u plagos një person tjetër, u lirua disa muaj më vonë me garanci pasurore.
Emri i Martinaj, i cili kishte një sërë biznesesh në fushën e basteve, është lidhur me disa ngjarje të rënda në vend. Na maj të këtij viti SPAK urdhëroi shpalljen në kërkim të tij, pas një operacioni të koduar “Golden Bullet”, që bazohej kryesisht në dëshmitë e një të penduari që ka pranuar se kishte marrë porosi për krime prej Martinajt. Por Martinaj dhe të tjerë të përmendur si shumë të kërkuar prej prokurorisë nuk u gjetën.
Në 17 korrik Brilant Martinaj, djali i xhaxhait të të kërkuarit, u vra në Fushë-Krujë në një atentat që i mori jetën edhe Diklen Vatës dhe Arbër Hoxhës. Ndërkohë në 11 gusht në polici u denoncua nga familjarët zhdukja e Ervis Martinajt.
Hetimet e policisë pas kësaj zhdukje zbuluan përfshirjen e oficerit të policisë Jeton Lami, i cili u arrestua më 23 gusht me akuzat e “shpërdorimit të detyrës”.