Policia e Shtetit njoftoi të martën arrestimin e shtetasit turk Faruk Fatih Ozer, i kërkuar nga Turqia për “krijim të një organizate kriminale” dhe “mashtrim me pasoja të rënda”. Operacioni i koduar “Brain” u drejtua nga Drejtoria e Policisë Elbasan e cila kishte zbuluar se turku i kërkuar pasi u zhduk me 2 miliard euro në kriptomonedha, jetonte me qira në territorin e saj, por ndalimi u bë në Palasë ku Ozer sëbashku me dy shqiptarë po kalonin pushimet.
“Falë përdorimit të metodave proaktive nga DVP Elbasan, në bashkëpunim me Prokurorinë e Rrethit Gjyqësor Elbasan, u organizua dhe u finalizua operacioni policor i koduar “Brain”. Në kuadër të këtij operacioni u bë kapja dhe ndalimi i shtetasit turk F. O., 28 vjeç”, thuhet në njoftimin e Policisë së Shtetit.
Përveç Ozer policia shoqëroi edhe 2 shtetas shqiptar, të identifikuar si B.Sh, 36 vjeç, banues ne Tiranë dhe Edevaldo Haxhiu, 37 vjeç, banues ne Durrës. Policia tha se këta persona ishin shoqëruar deri në sqarim të pozitës së tyre.
Ozer u shpall në kërkim në Turqi në vitin 2021 dhe ishte në listën e kuqe të Interpolit, pasi dyshohet se përvetësoi përmes mashtrimit rreth 2 miliard euro në kriptomonedhën Thodex. Ai akuzohet se mashtroi rreth 700 mijë njerëz. Ai vetë i mohoi akuzat në rrjetet sociale, por në prill të vitit të kaluar u arratis në Shqipëri, disa ditë para se të shpallej në kërkim ndërkombëtar.
Gjatë kërkimit për gjurmët e tij në vendin tonë policia arrestoi në shtator të vitit të kaluar Edevaldo Haxhiun, i ndaluar sërish në shoqërinë e Ozer të martën, dhe një person të dytë që u identifikuan se kishin ndihmuar Ozer të lëvizte nga një hotel në Tiranë në disa zona të tjera dhe më pas t’i humbiste ndjekjes. Por më pas të arrestuarit u liruan.
Policia bëri me dije se Ozerit i ishin bllokuar në cilësinë e provës materiale “laptopë, aparate celulare, karta bankash dhe materiale të tjera”.