Ministri i Brendshëm, Blendi Çuçi e justifikoi shkarkimin e tij me situatën e krimit në vend kohët e fundit, situatë që sipas tij nuk ka marrë përgjigjen e duhur nga policia.
“Shkarkim, i cili lidhet me mospërmbushjen e objektivave që kishim vënë në lidhje me drejtorin e përgjithshëm të Policisë dhe kryesisht lidhet me situatën e krijuar në muajt e fundit, situatë që kërkon një reagim më të fortë dhe një menaxhim më efikas të Policisë së Shtetit,” tha ai pas mbledhjes së qeverisë.
Shqipëria ka kaluar një verë të përgjakshme, me seri atentatesh të stilit mafioz në qytete të ndryshme dhe me implikim në disa raste të punonjësve të policisë.
Çuçi tha se ngjarja e Potamit në fillim të gushtit, ku një efektiv policie goditi për vdekje një fëmijë si dhe disa vrasje kriminale gjatë verës, ishin arsyet kryesore që çuan në shkarkimin e Nanos.
Qeveria nuk emëroi një drejtor të ri të Policisë së Shtetit, duke i kaluar kompetencat e ushtrimit të detyrës nëndrejtorit.
Nano ishte një oficer karriere në Policinë e Shtetit, dhe kishte drejtuar drejtorinë Antiterror para se të emërohej drejtor i Përgjithshëm dhe ishte dekoruar nga Ambasada Amerikane për merita të veçanta.
Qeveria shkarkoi në këtë mbledhje dhe dy zëvendësministra, atë të Infrastrukturës Ardi Veliu, i cili ka ushtruar më parë detyrën e Drejtorit të Policisë, dhe zëvendësministren e Mbrojtjes, Dallëndyshe Bici.
Zëvendëskryeministrja Belinda Balluku lajmëroi shkarkimin e tyre, duke thënë se do t’u jepen detyra të reja në vijim.
