Këshilli i Atlantikut të Veriu tha në një deklaratë për mediat të enjten se ishte njohur me deklaratat e Shqipërisë dhe aleatëve të tjerë që bënin përgjegjës Iranin për sulmin kibernetik ndaj sistemit qeveritar në Shqipëri dhe se e dënonte sulmin.
“Ne qëndrojmë në solidaritet me Shqipërinë pas sulmit kibernetik të fundit mbi infrastrukturën e saj kombëtare të informacionit”, thuhet në deklaratën e lëshuar nga NATO. Në deklaratë NATO thotë se ishte njohur me “Deklaratat e Shqipërisë dhe aleatëve të tjerë që ia atribuojnë përgjegjësinë për sulmin kibernetik Qeverisë së Iranit. Ne dënojmë fuqishëm aktivitete të tilla keqdashëse kibernetike të krijuara për të destabilizuar dhe dëmtuar sigurinë e një aleati dhe për të prishur jetën e përditshme të qytetarëve”.
Sekretari i Përgjithshëm i Aleancës Jens Stoltenberg tha në një postim në Twitter se NATO dhe aleatët kishin dhënë mbështetje dhe se aleanca do të merrte masa për t’i ndaluar dhe për tu mbrojtur ndaj këtyre sulmeve.
Më herët sulmi kibernetik i 15 korrikut, që bllokoi për disa ditë shërbimet qeveritare online dhe disa faqe zyrtare, u dënua nga Shtetet e Bashkuara të Amerikës. “SHBA dënon fort sulmin kibernetik të Iranit kundër aleatit tonë në NATO, Shqipërisë. Ne i bashkohemi thirrjes së kryeministrit Rama që Irani të mbajë përgjegjësi për këtë incident të paprecedentë kibernetik”, thuhej në një njoftim të ndarë nga Shtëpia e Bardhë dhe ambasada në Tiranë. Ndryshe nga Këshilli i Atlantikut, SHBA-të, që siç thuhet në deklarat ndihmuan Shqipërinë të luftonte dhe rimëkëmbte faqet online pas sulmit, ishin të drejt për drejta në fajësimin e Iranit.
Deklarata e Shtëpisë së Bardhë vë në dukje po ashtu se sulmi “shkatërroi të dhënat të qeverisë”. Por qeveria e Shqipërisë ka mbajtur qëndrim negativ sa i përket suksesit të sulmit. Kryeministri Edi Rama në njoftimin e ndërprerjes së marrëdhënieve diplomatike me Iranin të mërkurën se sulmi kishte dështuar.
Sulmi u dënua edhe nga Britania e Madhe. “Ne qëndrojmë me aleatët dhe partnerët tanë të NATO-s. Mbretëria e Bashkuar do të vazhdojë të punojë me Qeverinë shqiptare, në mbështetje të interesave të qytetarëve shqiptarë”, thuhet në një deklaratë të ambasadorit Alastair King-Smith që cilësoi Iranin si përgjegjës.
Gjermania po ashtu e dënoi sulmin, por nuk e përmendi Iranin në deklaratën e saj. “Shqipëria ka solidaritetin tonë të plotë në këtë krizë serioze kombëtare kibernetike. Gjermania është e gatshme të ofrojë mbështetje praktike në menaxhimin e pasojave”, thuhet në deklaratën e ambasadës.
Të mërkurën më 7 shtator Shqipëria ndërpreu marrëdhëniet diplomatike me Iranin dhe të enjten stafi i ambasadës u largua nga vendi ynë, ndërsa forca speciale të policisë kontrolluan godinën.
Vendimi u njoftua nga kryeministri Edi Rama që cilësoi se Irani ishte gjetur përgjegjës për sulmin dhe se kishte njohur aleatët me “rezultatet e pakundërshtueshme të hetimit që provon burimin e agresionit”.
Marrëdhëniet mes Shqipërisë dhe Iranit kanë qenë të tensionuara prej vitesh për shkak të vendimit të qeverisë shqiptare për të strehuar si refugjatë disa mijëra muxhahedinë, pjesë e organizatës opozitare, MEK. Muxhahedinët u zhvendosën në Shqipëri me ndërmjetësimin e Shteteve të Bashkuara të Amerikës.
