Departamenti i Thesarit i Shteteve të bashkuara të Amerikës njoftoi të premten se kishte bllokuar të gjitha pasuritë apo aksionet nën juridiksionin amerikan të ministrit Iranian të inteligjencës Esmail Khatib, ministrisë që ai drejton dhe disa grupeve të përfshira në sulme kibernetike përfshi atë ndaj Shqipërisë në korrik të këtij viti.
“Si rezultat i sanksionit të sotëm, të gjitha pronat dhe interesat në prona të sanksionuarve që janë subjekt i SHBA bllokohen, dhe të gjithë shtetasve të SHBA u ndalohet të përfshihen në transaksione me ta. Për më shumë, të gjitha entitetet që zotërohen me 50 për qind apo më shumë prej këtyre personave janë po ashtu të bllokuara”, thuhet në njoftimin e ndarë për mediat nga Departamenti i Thesarit.
Sipas njoftimit sanksionet erdhën pas përfshirjes së Ministrisë së Inteligjencës Iraniane, MII, dhe grupeve të lidhura me të në sulmin kibernetik ndaj Shqipërisë.
“Aktorë kërcënues kibernetikë, për të cilët është përcaktuar se janë të financuar nga qeveria e Iranit dhe Ministria e Inteligjencës, sulmuan në korrik 2022 sistemet kompjuterike të qeverisë shqiptare duke detyruar këtë të ndërpresë shërbimet publike online për qytetarët”, thuhet në njoftim.
Në njoftim citohen nënsekretari i Departamentit të Thesarit për Terrorizmin dhe Inteligjencën Financiare Brian E. Nelson, i cili thotë se “Sulmi kibernetik i Iranit ndaj Shqipërisë injoroi normat e sjelljes shtetërore në kohë paqeje në hapësirën kibernetike, të cilat përfshijnë edhe frenimin e sulmeve apo dëmtimit të infrastrukturës kritike që ofron shërbime ndaj publikut”. Nelson thotë se kjo sjellje e Iranit nuk do të tolerohet.
Në njoftim po ashtu përmenden edhe grupe që ndër të tjera kanë sulmuar entitete qeverisëse në Turqi dhe që janë angazhuar në sulme të ngjashme, që sipas SHBA janë po ashtu të lidhura me qeverinë Iraniane.
Në 7 shtator qeveria e Shqipërisë ndërpreu marrëdhëniet diplomatike me Iranin, duke e fajësuar atë për sulmin kibernetik. Pas kësaj mase NATO dhe vende aleate dënuan sulmin dhe i ofruan Shqipërisë mbështetje për të përmirësuar sigurinë kibernetike.