Zëvendësministri i Brendshëm, Andi Mahila, prezantoi memorandumin para komisionit të Ligjeve dhe atij të Sigurisë si “shkëmbimi i informacionit me qëllim për të forcuar kufinjtë përkatës”.
Qëllimi i tij, tha ai, “nënkupton, mënyrën e rregullimit se për cilat raste dhe cilat baza një person mund të hyjë apo të qëndrojë në vendet pjesëmarrëse dhe mbështetjen e përpjekjeve për kontrollin e informacionit, përfshi ndjekje penale për veprimtari të lidhura me të”.
Ai tha se memorandumi zëvendësonte një dokument të mëparshëm dhe saktësonte llojet e informacioneve që do të shkëmbehen, duke nisur nga numrat e telefonit, të dhënat për automjetet dhe adresat e personave pritës, etj..
Dokumenti parashikon emërimin e oficerëve ndërlidhës mes palëve që do të jenë përgjegjës për ruajtjen dhe shkëmbimin e informacionit.
Zëvendësministri pranoi se ka rritje nga periudha prill-gusht të numrit të emigrantëve që hyjnë nëpërmjet kanalit të La Manshit, por sipas tij, statistika tregojnë ulje në krahasim me vitin 2019.
“Sipas të dhënave janë 12.747 shtetas të paligjshëm në periudhën janar-qershor 2022, por gjithsesi kjo shifër është 2 për qind më e ulët se ajo vitit 2019,” tha ai në komisionin e Ligjeve.
Shkaqet që kanë ndikuar në rritjen e numrit të shqiparëve që kalojnë në rrugë detare nga Franca në Angli, sipas Mahilës, lidhen me motin e ngrohtë dhe situatën politike në Britani. “Lidhet edhe me situatën në Britaninë e Madhe, procesin zgjedhor dhe dorëheqjen e kryeministrit”- u shpreh ai.
Mahila komentoi edhe shifrat e publikuara në mediat britanike. “Deklaratat e politikanëve anglezë apo ato që media britanike ka nxjerrë bëjnë fjalë për 4 në 10 emigrantë, dhe ajo është kundërshtuar po prapë nga ata. Një herë u tha 40% pastaj kaloi në 17%”- tha ai.
Gjithsesi ai pranoi se ka një amulli shifrash, pasi ambasada shqiptare në Londër raporton një shifër jozyrtare prej 150 mijë shtetasish shqiptarë që jetojnë atje. “Ndërsa vetë shteti anglez jep një shifër 47 mijë,” tha ai.
Deputetët e opozitës në të dy komisionet shprehën qëndrimin e tyre pro memorandumit, por kërkuan që qeveria të jepte sqarime për shtimin e numrit të emigrantëve të paligjshëm drejt brigjeve të ishullit britanik.
Sipas tyre, qeverisja aktuale është përgjegjëse për krijimin e pasigurisë dhe varfërisë që nxisnin emigrimin.
Pyetjeve të deputetëve të PD-së për arsyet e emigrimit dhe nëse ishte bërë ndonjë analizë për këtë fenomen, Mahila kërkoi që të mos u përgjigjej, duke i cilësuar jashtë kompetencave të tij.
“Ne kemi përgjegjësi ruajtjen e kufirit, po kjo çështje nuk është vetëm përgjegjësi e ministrisë së Brendshme,” tha ai.