Gjyqet për dosjen 184 në Gjykatën e Dibrës u shtynë edhe një herë të enjten, si pasojë e mungesës së avokatit mbrojtës, i cili iu drejtua gjykatës me një email për të njoftuar se ishte i sëmurë dhe se nuk mundej të udhëtonte drejt Dibrës.
Në gjyqin kundër ish-kryepolicit të Peshkopisë Robert Aga dhe ish-administratorit të njësisë administrative Lurë Hasan Hoti, gjyqtarja Nertila Kape njoftoi se avokati mbrojtës ka dorëzuar një kërkesë për shtyrje për shkak se është sëmurë. Avokati Gentjan Rumano nuk bëri të ditur se nga se vuante, por sipas shkresës së lexuar nga gjyqtarja, ai gjendej në atë çast duke kryer analizat mjekësore përkatëse. I pandehuri Robert Aga nuk ishte i pranishëm pasi shërbimi postar nuk kishte arritur ta njoftonte për datën e gjyqit.
Gjyqi u shty për pas dy javësh.
Ky proces u shty javën e kaluar për shkak të mungesës për shkaqe shëndetësore të gjyqtares ndërsa më herët, si pasojë e grevës së avokatëve. Seanca e fundit e këtij procesi i përket datës 19 prill 2022. Në këtë proces nuk ka përfunduar ende hetimi gjyqësor.
Avokati Gentjan Rumano është gjobitur dy herë për mungesa pa arsye në proceset hetimore të dosjes 184 në Dibër.
Aga dhe Hoti përballen me akuzat për manipulim zgjedhjes në lidhje me zgjedhjet e pjesshme për kryetar bashkie në Dibër në vitin 2016.
Në procesin tjetër përballë akuzave gjenden ish-drejtori i Drejtorisë Arsimore Drini Gjeci dhe ish-administratori i njësisë Tomin Nuri Meda, të akuzuar më vete për abuzim detyre dhe kanosje apo dhunim të votuesve. Në këtë proces, prokurori Urim Buci ka shpallur pretencën dhe ka kërkuar 3 vjet burg me kusht ndërsa të pandehurit do të përfitojnë ulje për shkak të “gjykimit të shkurtuar”. Seanca e fundit në këtë proces është zhvilluar më 19 prill.
Dosja 184 u krijua pasi prokuroria vendosi nën përgjim zyrtarët dhe përkrahësit e Partisë Socialiste gjatë fushatës zgjedhore për kryetar bashkie në vitin 2016. Provat e mbledhura nga përgjimet krijuan një tablo blerjesh masive votash, shantazhim të votuesve dhe keqpërdorim të burimeve publike. Hetimet gjithsesi nuk sollën pasoja pasi prokurorët nuk vepruan për të kryer arrestime në kohën kur krimet ndodhën. Dosja u bë pjesërisht publike pasi dokumente të saj rrodhën në media.
Aktualisht kanë kaluar gjashtë vjet nga kryerja e krimeve të aluduara në zgjedhjet e Dibrës. Deri më sot nuk ka asnjë proces gjyqësor të përfunduar dhe asnjë person përgjegjës të dënuar.
