Komisioni për reformën zgjedhore miratoi të hënën kalendarin e punës, duke parashikuar diskutime për ndryshime ligjore që mund të prekin aspekte të rëndësishme të sistemin zgjedhor për zgjedhjet lokale që do të mbahen brenda 6 muajve të parë të vitit të ardhshëm.
Po ashtu, bashkëkryetari socialist Damian Gjiknuri tha se komisioni është i hapur të diskutojë edhe për ndryshime që mund të prekin Kushtetutën, nëse do të ketë konsensus politik nga palët.
“Jemi të hapur të diskutojmë për çdo gjë që lidhet me rekomandimet e OSBE-ODIHR-it, por edhe për të tjera për të cilat ne palët biem dakord me konsensus, që prekin elementë të sistemit, pa prekur Kushtetutën, pasi nuk është në tagrin tonë,” tha ai.
Gjiknuri shtoi se diskutimet për Kushtetutën do të bëhen nëse ka dakordësi politike dhe t’i rekomandohet më tej Kuvendit ngritja e një komisioni të posaçëm për ndryshime kushtetuese.
Diskutimi për kalendarin u fokusua tek pika që e lidhte punën e këtij komisioni me atë të reformës territoriale, i cili po diskuton mundësitë e një harte të re të njësive vendore dhe administrative.
“Ne nuk kemi rënë dakord për ndryshim të sistemit, nëse do të ketë dakordësi atje (Komisioni i reformës territoriale), ky komision është i detyruar të reflektojë ndryshimet përkatëse,” tha Gjiknuri.
Edhe bashkëkryetari nga opozita, Enkelejd Alibeaj, foli për nevojën për ndryshime në sistemin zgjedhor për zgjedhjet lokale.
“Është e udhës nëse në komisionin e reformës territoriale do të ketë ndryshime që prekin sistemin, jemi të detyruar të bëjmë ndryshime në sistem. Por edhe nëse kjo nuk ndodh ne duhet të diskutojmë sistemin zgjedhor sa i përket zgjedhjeve vendore,” tha ai.
Përfaqësuesi i Partisë së Lirisë, Petrit Vasili, kërkoi që komisioni të mos e lidhte punën e tij me punën e një komisioni tjetër paralel. “Ky nuk është komision i reformës së ligjit vetëm për pushtetin lokal,” tha ai, duke kërkuar që puna të fokusohet në objektin e punës dhe të diskutohet reforma zgjedhore në tërësi.
Komisioni i reformës zgjedhore humbi 6 muaj kohë pa asnjë rezultat që prej ngritjes së tij nga Kuvendi në muajin shkurt. Me zgjatjen e mandatit të punës deri më 5 dhjetor, komisioni do të duhet të përfundojë propozimet për ndryshimet në kodin zgjedhor.
Paralelisht, Kuvendi po shqyrton propozimet për reformën territoriale-administrative në një komision të posaçëm që pritet të përfundojë në 21 tetor pas zgjatjes së dytë të afatit.
Në mbledhjen e së hënës në këtë komision u paraqitën propozimet e ekspertëve të Partisë Demokratike, që kërkojnë një hartë të re territoriale me shtimin e 31 bashki të reja, kryesisht rurale, dhe shkrirjen e 12 qarqeve në 3 apo 6 rajone të mëdha.
Partia Socialiste është shprehur skeptike ndaj këtyre propozimeve dhe ka mbrojtur reformën në fuqi me 61 bashki që u miratua në vitin 2014.
