Gjyqtari Pëllumb Zaimi i Gjykatës së Beratit do të përballet të premten më 14 tetor me Komisionin e Pavarur të Kualifikimit. Procesi i tij i vetingut po kryhet nga trupa e përbërë nga Firdes Shuli, Suela Zhegu dhe Brunilda Bekteshi.
Pëllumb Zaimi e ka nisur karrierën në sistemin e drejtësisë në vitin 1998 dhe ka punuar fillimisht si gjyqtar dhe kryetar i Gjykatës së Skraparit. Prej vitit 2008, ai e ushtron funksionin në Gjykatën e Rrethit Gjyqësor Berat.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet pasurinë e deklaruar nga gjyqtari Pëllumb Zaimi nga viti 2003 deri në fund të vitit 2016. [Kliko për skedën në PDF].
Në deklarimin për të herë të parë në vitin 2003, gjyqtari Pëllumb Zaimi ka deklaruar pasuri me vlerë 2.6 milionë lekë, ndërsa në fund të vitit 2016, pasuria familjare kap vlerën e 6.5 milionë lekëve.
Në fund të vitit 2016, Zaimi deklaron pasuri të paluajtshme me vlerë 6 milionë lekë, kursime në cash prej 363 mijë lekësh dhe automjet me vlerë 200 mijë lekë.
Të ardhurat familjare për periudhën deklaruese janë 23.9 milionë lekë, nga të cilat 65% kanë si burim pagën e subjektit nga funksioni i gjyqtarit, 26% pagat e familjarëve, 4.7% nga shitja e pasurisë së paluajtshme dhe gati 2% nga dhuratat në cash.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 13 vite të deklarimit, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamur të kuq” kontratën e sipërmarrjes për blerjen e një apartamenti.
Subjekti Pëllumb Zaimi në deklarimin periodik/vjetor 2008 deklaron një kontratë sipërmarrje për blerje apartament banimi me vlerë $48,700 euro me sipërfaqe 97.4m2. Kjo kontratë është lidhur me datë 12/06/2007, por deklarohet një vit më vonë. Nga vlera totale, subjekti ka shlyer vetëm 37,000 euro me burim nga kursimet familjare ndër vite, ndërsa 11,700 dollarë është detyrim ndaj firmës sipërmarrëse, e cila shlyehet plotësisht gjatë vitit 2016.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Për më shumë dokumente vizitoni databazën tonë dokumente.reporter.al