Gjykata e Rrethit Gjyqësor Dibër vendosi të enjten masë sigurie detyrim paraqitje për dy të arrestuarit pas aksidentit me vdekje në një prej kompanive që menaxhon një galeri të Minierës së Bulqizës. H., 50 vjeç, banues në Bulqizë, me detyrë Drejtues teknik i një subjekti minerar dhe B. T., 44 vjeç, banues në Bulqizë, me detyrë brigadier, u arrestuan të martën pasi në galerinë që ata menaxhonin humbi jetën Kujtim Lila, 52 vjeç, i punësuar si zjarrmëtar.
Ata akuzohen për shkelje të rregullave të sigurimit në punë, por në gjykatë prokurori Urim Kalia, ka kërkuar masë sigurimi “detyrim paraqitje”, që është lënë në fuqi nga gjyqtari, Ardit Kuka.
Vdekja e 52-vjeçarit Lila ishte e katërta me pasojë vdekjen në miniera gjatë këtij viti. Dy viktima u regjistruan në mars në një galeri në Tropojë, ndërsa një rast tjetër u shënua po në Bulqizë në korrik.
Galeritë e nxjerrjes së kromit mbeten ndër vendet më të pasigurta të punës në Shqipëri. Të dhënat e mara nga BIRN nga Inspektorati i Punës vitin e kaluar në miniera e karriera u aksidentuan 28 persona, 6 prej të cilëve humbën jetën.
Në një reagim publik Sindikata e Minatorëve të Bashkuar të Bulqizës apeloi për organizim të minatorëve dhe fajësoi institucionet se nuk vepronin për të siguruar jetën e tyre. “Një tjetër minator i vrarë në galeritë e Bulqizës. Institucionet shtetërore bëjnë sehir si gjithmonë, madje as emrin nuk ua përmendin punëtorëve të vrarë”, thuhet në reagimin e SMBB.
