Dy subjekte të prodhimit të inerteve për ndërtim, emri i të cilave nuk u bë me dije, u gjobitën nga Inspektorati Kombëtar i Mbrojtjes së Territorit të premten, pasi u kapën duke vjedhur rërë në shtratin e lumit Mat gjatë natës.
Inspektoriati i Mbrojtjes së Territorit Drejtoria Rajonale Lezhë, njoftoi se dy subjektet u kapën gjatë monitorimeve gjatë orëve të natës, kohë e cila sipas IKMT-së shfrytëzohet më së shumti për marrjen e inerteve nga subjekte apo individ të ndryshëm.
“Gjatë kontrolleve të ushtruara janë kapur në flagrancë ekskavator dhe kamiona të cilët merrnin materiale inerte përgjatë shtratit të Lumit Mat në mënyre të paligjshme dhe pa lejen e lëshuara nga organet kompetente”, njoftoi IKMT.
Drejtori i IKMT-së Lezhë Flori Gjini tha se monitorimi do të jetë i vazhdueshëm dhe nuk do të ketë tolerime ndaj shkelësve të ligjit.
Shfrytëzimi i paligjshëm i Lumit Mat për inerte nga kompani të ndryshme mbetet në një problem mjaft shqetësues, ndërsa masat e pretenduara nga autoritetet kanë dështuar t’i vënë fre fenomenit. Nga marrja e inerteve lumi ka ndryshuar rrjedhë, duke gërryer qindra hektarë tokë bujqësore, si dhe ka shkaktuar dëmtime dy ura përfshirë dhe urën monument kulture të Zogut, e cila ka rënë me disa metra dhe rrezikon seriozisht shembjen totale.
