Të dhënat e Departamentit të Drejtësisë në SHBA tregojnë se udhëheqësi i Partisë Republikane, Fatmir Mediu ka angazhuar kompaninë lobuese ‘Bailey Strategic Advisors, LLC’.
Bailey Strategic Advisors, LLC është një kompani e regjistruar në Dallas, Teksas. Sipas deklaratës të bërë nga kompania lobuese në Departamentin e Drejtësisë në SHBA, qëllimi i përfaqësimit të Mediu është realizimi i takimeve me zyrtarë amerikanë, për përmirësimin e perceptimit të Shqipërisë tek këta të fundit.
Për realizimin e këtyre shërbimeve kompania shprehet se nuk ka një kontratë të shkruar midis palëve. Ajo ka njoftuar se ka realizuar kontakte nëpërmjet mesazheve me senatorin John Cornyn dhe Samantha Leahy – një përfaqësuese të senatorit Ted Cruz, në emër të Famtir Mediut.
Mediu i tha BIRN se nuk ka shpenzuar asnjë qindarkë për lobim në SHBA. Ai shtoi se në bazë të ligjeve amerikane çdo komunikim për takim me qeveritarë të vendeve të huaja duhet deklaruar dhe regjistruar.*
“Roy Bailey është miku im dhe kam kërkuar mbështetjen e tij për dy takime, një me senatorin Ted Cruz dhe Samantha Leahy – që punon me senatorin, si dhe senatorin Cornyn,” tha ai.
“As kam pajtuar, as kam firmosur dhe as do të firmos ndonjë kontratë lobimi sepse për mua këto janë absurditete shqiptare të cilat nuk kanë asnjë efekt pozitiv në mardhëniet ndërmjet dy vëndeve tona,” shtoi ai.
Mediu shpjegoi se Samantha Leahy ka qenë në Tiranë me një grup tjetër nga Senati dhe ka kontaktuar sepse interesi i tyre ka qenë krijimi i pavarësisë energjitike të Shqiperisë dhe rajonit nga burimet ruse si dhe investimet amerikane ne fushën e energjisë – nga kompani të cilat janë në bashkëpunim me qeverinë për investime në sektorin e energjisë. Ai shtoi se senatori Cornyn po ashtu është anëtar i Asamblese Parlamentare të OSBE
“Për mua çështjet e sigurise, energjisë dhe mardheniet me SHBA janë mbi partitë politike,” përfundoi ai.
Këto kontakte janë realizuar midis muajve qershor dhe gusht 2022. E njejta kompani është angazhuar edhe nga kryeministri i Kosovës, Albin Kurti për të lobuar zyrtarët e SHBA-së.
*Ky shkrim është përditësuar për të reflektuar reagmin e z.Fatmir Mediu
