Këshilli për Rregulloren, Imunitetin dhe Mandatet vendosi të mërkurën që të dërgojë në Kuvend dy raporte të kundërta në lidhje me papajtueshmërinë e mandatit të deputetes dhe ministres Olta Xhaçka, pasi mazhoranca nuk pranon që të dërgojë në Gjykatën Kushtetuese mocionin e opozitës.
Socialistët kundërshtuan si të pabazuara dy mocionet e paraqitura nga deputetët e opozitës me objekt të njëjtë; papajtueshmërinë e mandatit për Xhaçkën, pasi bashkëshorti i saj Artan Gaçi përfitoi statusin “investitor strategjik” dhe të drejtën e përdorimit të brigjeve të detit me vendim qeverie.
Sipas pretendimeve të shumicës në pushtet deputetja nuk ka përfituar nominalisht nga pasuria publike siç përcakton neni përkatës në Kushtetutë.
Opozita kërkoi që vlerësimi i thelbit të çështjes i takonte gjykatës dhe se Kuvendi ishte i detyruar t’ia kalonte mocionin për gjykim, por sipas konkluzionit të shumicës “nuk ka asnjë çështje për shqyrtim që duhet t’i dërgohet Gjykatës Kushtetuese”.
Sipas relatores Klotilda Bushka, e cila lexoi përfundimit e raportit në mbledhjen e Këshillit, kërkesa e opozitës nuk i plotëson kriteret për t’u dërguar për interpretim në Gjykatën Kushtetuese duke i rekomanduar Kuvendit rrëzimin e mocionit.
“Shumica, në referim të vendimit nr.93/2016 të Gjykatës Kushtetuese, çmon se vetëm rastet e parashikuara në nenin 70, pika 3 të Kushtetutës, hyjnë në juridiksionin e kësaj gjykate; për rastet e tjera të papajtueshmërisë së mandatit të deputetit (neni 70, pika 2) apo konfliktit të interesit, Gjykata Kushtetuese nuk ka juridiksion dhe vetëm për këto raste Kuvendi sipas nenit 70, pika 4 të Kushtetutës mund të vendosë t’ia dërgojë çështjen për shqyrtim Gjykatës Kushtetuese”- thuhet në raport.
Po ashtu, PS, pretendon se, “nga aktet e depozituara prej kërkuesve të të dy mocioneve, nuk rezulton që për deputeten Olta Xhacka dhe bashkëshortin e saj, si ortak në shoqërinë tregtare “AG TÇ” SHPK, të plotësohen kriteret kushtetuese të parashikuara në pikën 3 të nenit 70 të Kushtetutës, (kryerja e veprimtarisë fitimprurëse që buron nga pasuria e shtetit dhe pushtetit vendor dhe përfitimi i pasurive të këtyre të fundit), për vënien në lëvizje të Gjykatës Kushtetuese”.
Sipas raportit të opozitës, bashkëshorti i ministres me anë të kompanisë “AG TÇ” shpk ka marrë status investitori strategjik nga qeveria për ndërtimin e një hoteli me 5 yje në bregdetin e Dhërmiut.
Sipas deputetit Gazmend Bardhi ky status parashikon edhe të drejtën e përdorimit të brigjeve të detit, që janë pasuri publike, para hotelit për 30 vite, reduktim të TVSH-së për shkak të trajtimit preferencial që parashikon ligji për investimet strategjike.
“Si rezultat i përdorimit të brigjeve të detit, e cila përbën pasuri shtetërore, për instalimin e stacioneve të plazhit në fshatin Gjilekë, Himarë, shoqëria “AG.TÇ” sh.p.k., në bashkëpronësi të bashkëshortit dhe të deputetes Xhaçka, do të sigurojë të ardhura, çka përbën qartazi një veprimtari fitimprurëse që buron nga pasuria e shtetit”- thuhet në raportin e opozitës.
Bardhi përmendi dhe faktin se si Gaçi ishte munduar të fshihte konfliktin e interesit duke krijuar një kompani tjetër në emër të kunatës së Xhaçkës duke i dhënë në menaxhim brigjet e detit.
Demokratët pretenduan se mocioni është në përputhje me praktikën e mëparshme parlamentare për raste të ngjashme dhe i konsideruan argumentet e PS-së si mbrojtje politike për Xhaçkën.
Bardhi paralajmëroi se deputetët nismëtarë do t’i drejtoheshin në mënyrë të pavarur gjykatës për këtë çështje nëse me forcën e kartonit PS-ja do ta rrëzonte mocionin në seancë plenare.
