Gjykata e Dibrës nuk arriti të zhvillonte sërish seancën për “Dosjen 184” me të akuzuar ish-kryepolicin e Peshkopisë Robert Aga dhe ish-administratorit të njësisë administrative Lurë Hasan Hoti, të akuzuar për krime zgjedhore.
Gjyqtarja Nertila Kape u njoh në seancë me një kërkesë të avokatit Gentian Rumano për të hequr dorë nga mbrojtja dhe më pas vendosi shtyrje të seancës për dy javë kur duhet të paraqitet avoakti i ri. I pyetur nga BIRN në telefon Rumano tha se hoqi dorë për shkak të ngarkesës dhe u justifikua me faktin se gjyqi ishte zgjatur shumë.
Gjykimet për dy çështjet e të njëtit hetim nuk zhvillohen prej 6 muajsh dhe janë shtyrë për arsye të ndryshme dhe problemeve shëndetësore të gjyqtarëve, avokatëve, mungesës së të pandehurve e të ngjashme.
Procesi tjetër ndaj ish-drejtorit të Drejtorisë Arsimore Drini Gjeci dhe ish-administratori i njësisë Tomin Nuri Meda, të akuzuar më vete për abuzim detyre dhe kanosje apo dhunim të votuesve, u shty dy ditë më parë për shkak të problemeve shëndetësore të prokurorit.
Në këtë proces, prokurori Urim Buci ka shpallur pretencën dhe ka kërkuar 3 vjet burg me kusht ndërsa të pandehurit do të përfitojnë ulje për shkak të “gjykimit të shkurtuar”. Seanca e fundit në këtë proces është zhvilluar më 19 prill dhe ende nuk janë lexuar pretendimet e mbrojtjes.
Dosja 184 u krijua pasi prokuroria vendosi nën përgjim zyrtarët dhe përkrahësit e Partisë Socialiste gjatë fushatës zgjedhore për kryetar bashkie në vitin 2016. Provat e mbledhura nga përgjimet krijuan një tablo blerjesh masive votash, shantazhim të votuesve dhe keqpërdorim të burimeve publike. Hetimet gjithsesi nuk sollën pasoja pasi prokurorët nuk vepruan për të kryer arrestime në kohën kur krimet ndodhën. Dosja u bë pjesërisht publike pasi dokumente të saj rrodhën në media.
Aktualisht kanë kaluar gjashtë vjet nga kryerja e krimeve të aluduara në zgjedhjet e Dibrës. Deri më sot nuk ka asnjë proces gjyqësor të përfunduar dhe asnjë person përgjegjës të dënuar.