Shqiptarët pritet të votojnë për pushtetin vendor më 14 maj të vitit 2022, në një palë zgjedhjesh që vijnë pas zgjedhjeve të bojkotuara të vitit 2019 dhe pas kontrollit të 60 prej 61 bashkive nga ana e Partisë Socialiste.
Presidenti Bajram Begaj publikoi dekretin për zgjedhjet vendore të hënën. Bashkë me dekretin, Begaj dha edhe disa këshilla për politikanët, përfshirë nxitjen për të ecur përpara me reformën zgjedhore si dhe nevojën që qytetarët të kenë mundësi zgjedhjeje.
“Presidenti Begaj vlerëson nevojën e vendosjes së normalitetit politik në pushtetin vendor dhe u bën thirrje partive politike që të shkojnë në këto zgjedhje me alternativa politike serioze e konkurruese, që kanë në qendër të vëmendjes qytetarin dhe standardet më të mira demokratike,” thuhet në njoftimin e presidencës për dekretin.
“Kreu i Shtetit i fton votuesit të mos anashkalojnë detyrën qytetare të mirë-informimit mbi alternativat politike dhe ushtrimit të të drejtës së votës, të pandikuar nga interesa, që cënojnë votën dhe vullnetin e lirë,” lexohet më tej në dekret.
Shqiptarët votojnë në zgjedhjet për pushtetin vendor për të zgjedhur 61 kryetarë bashkish si dhe rreth 1500 këshilltarë. Këshilltarët zgjidhen nga listat e mbyllura të partive politike, në një skemë në të cilën, qytetarët votojnë një parti të caktuar ndërsa kandidatët e saj zgjidhen në bazë të numrit të votave që partia ka marrë.
Bashkia më e madhe në vend është Tirana me rreth 850 mijë banorë ndërsa bashkia më e vogël është Pusteci me rreth 3 mijë banorë.
Në zgjedhjet e ardhshme Partia Socialiste pritet të garojë e vetme përballë opozitës, e cila aktualisht është në negociata për të paraqitur kandidatë të përbashkët të grupimeve të ndryshme.
Partia kryesore në opozitë, Partia Demokratike, mbetet e ndarë ligjërisht dhe formalisht mes grupit të mbështetësve të ish-kryeministrit Sali Berisha, i cili e ka shpallur veten kryetar, dhe grupit të deputetëve kundërshtarë të tij, të cilët janë pa një kryetar formal por që kanë një kontroll nominal ligjor. Gjykata e Apelit duhet të japë një vendim për mosmarrëveshjen e të dy grupeve pasi gjykata e shkallës së parë i dha të drejtë ish-kryeministrit Berisha shumë muaj më parë.
Në rradhët e socialistëve beteja duket se po udhëhiqet personalisht nga kryeministri Edi Rama ndërsa kandidatët pritet të kenë kryesisht një rol figurantësh.
