Policia dhe prokuroria e Dibrës njoftuan të mërkurën arrestimin e 6 personave dhe bllokimin e një sasie prej 1162 kilogramësh lëndësh eksplozive në tre subjekte minerare në zonën e Batrës.
Në një konferencë për mediat Drejtori i Drejtorisë Vendore të Policisë Dibër, Dhimitraq Ziu dhe prokurori Urim Buci, njoftuan se aksioni i pagëzuar “Toka e artë”, i nisur si hetim ndaj vëllezërve Brolind dhe Drilon Kotja të akuzuar për shfrytëzim të paligjshëm të një galerie minerare në zonën e Batrës, zbuloi edhe dy subjekte të tjera të akuzuar për keqpërdorim të lëndëve plasëse dhe tregtim të paligjshëm të tyre.
Vëllezërit Kotja u arrestuan sipas policisë për veprat penale “Ushtrimi i aktivitetit pa qenë i regjistruar pranë organeve tatimore”, “Shkelja e rregullave mbi lëndët plasëse, djegëse dhe radioaktive” dhe “Mbajtja pa leje dhe prodhimi i armëve shpërthyese dhe i municioneve”.
“Dy vëllezërit kishin përvetësuar një galeri në Batër dhe vazhdonin të kryenin punime, me qëllim nxjerrjen dhe shfrytëzimin e materialit minerar”, thuhet në komunikatë.
Po ashtu policia arrestoi edhe një 38-vjeçar që punonte si zjarrmëtar për dy të ndaluarit.
Ndërkohë administratorët e dy kompanive që përdornin dhe tregtonin lëndë plasëse u arrestuan me akuzën “Shkelja e rregullave mbi lëndët plasëse, djegëse dhe radioaktive” dhe “Fshehja e të ardhurave”.
Policia bëri me dije arrestimin e I. L., 34 vjeç, banues në Krastë administrator i njërës prej kompanive ku u sekuestrua mbi 1 ton lëndë plasëse dhe K. L., 48 vjeç, banues në Krastë, administrator i një subjekti të dytë të cilit iu gjetën 96 kilogramë lëndë plasëse. Po ashtu u sekuestrua dhe një sasi prej 3815 kapsollash elektrike. Një zjarrmëtar i dytë që punonte për to po ashtu u arrestua.
“Administratorët e të dy subjekteve për përdorimin dhe tregtimin e lëndëve plasëse, njëri prej tyre edhe drejtues teknik i subjektit të tij, konkretisht shtetasi K. L., tregtonin lëndë plasëse në mënyrë të paligjshme dhe në kundërshtim me rregullat e përdorimit dhe të tregtimit të lëndëve plasëse”, bëri me dije policia.
Drejtuesit e policisë dhe prokurorisë bënë me dije se për të ndaluarit ishte kërkuar heqje e licencave.
