Tre persona të dyshuar për mashtrime online në shuma të mëdha u arrestuan të mërkurën pas një aksionit të Prokurorisë së Posaçme në Tiranë përfaqësuar nga Ened Nakuçi dhe Prokurorit italian në Pordenone, Raffaele Tito.
Të arrestuarit akuzohen se ishin pjesë e një organizate kriminale, e cila shfrytëzoi pandeminë për të mashtruar mbi 200 qytetarë italinë të investonin në aksione duke i zhdukur më pas paratë që sipas hetimit ishin gati 3 milion euro, të konvertuara në kriptomonedha.
“Mendohet se kjo organizatë ka arritur të mashtrojë qindra qytetarë italianë, banues në të gjithë territorin Italian, për një total prej më shumë se tre milionë euro, me gjasë kjo shifër është vetëm maja e ajsbergut pasi mendohet se shifra mund të jetë më e lartë”, thuhet në njoftimin e SPAK për mediat.
Gjatë konferencës për shtyp prokurori italian Raffaele Tito tha se paratë nuk mund të ktheheshin pas, për shkak të pamundësisë për të ndjekur kriptomonedhat. Tito apeloi që qytetarët të ishin të kujdesshëm dhe të investonin vetëm në investues të licencuar.
Nakuçi tha se hetimet kishin filluar në qytetin e Pordenone, Itali ku pas verifikimeve të mëtejshme ka dalë një skemë mashtrimi mjaft komplekse. Hetimet zbuluan se “viktimat kontaktoheshin nëpërmjet telefonit, ku bindeshin nga mashtruesit për të investuar fillimisht shifra të vogla, të cilat transformoheshin në fitime jashtëzakonisht të mëdha”.
Viktimat panë fillimisht fitimet e tyre në disa platformave fiktive të trefishoheshin në pak ditë, kjo u mundësoi mashtruesve të merrnin nën kontroll llogaritë bankare të tyre. “Besnikëria e “klientit” ishte kaq efikase sa viktima në pjesën më të madhe të rasteve, e ka lejuar mashtruesin të përdorte në distancë kompjuterin personal, i cili në kohë reale realizonte transfertat e parave nëpërmjet kontrollit të një softueri në distancë të quajtur “Anydesk””, bëri me dije Nakuçi. Nga hetimet rezultoi se dhënia e aksesit në kompjuterë u shfrytëzua më pas prej mashtruesve për të mbledhur të dhëna personale që u përdorën më pas për shantazh apo për të bindur klientët.