Prokuroria e Posaçme i ka bërë me dije të mërkurën ish-drejtoreshës së Autoritetit Rrugor Shqiptar Sonila Qato, akuzën e “shkeljes së barazisë në tendera” për tenderin për ndërtimin e tunelit në rrugën “Kardhiq-Delvinë”.
Qato e cila u paraqit mëngjeisn e të mërkurës në zyrat e SPAK, i tha BIRN në një bisedë për mes Ëhatsapp se i ka kundërshtuar gjetjet e prokurorit. “Kundërshtova gjetjet e prokurorit duke mos i pranuar ato dhe do ndjek procedurat ligjore në vijim”, tha Qato që u paraqit në prokurori me avokatin Vladimir Meçe.
Qato u kallëzua nga Kontrolli i Lartë i Shtetit dh enjë prej kompanive private për abuzim në tenderin për tunelin në aksin Kardhiq-Delvinë. Në fillim të tetorit, Qato u thirr në SPAK për të dëshmuar në lidhje me dy akuzat e ngritura më herët: atë të “Shpërdorimit të detyrës” dhe të shkeljes së barazisë në tendera.
Qato dha dorëheqjen nga detyra në Autoritetin Rrugor Shqiptar në shtator 2019, pasi u përfshi në një shkëmbim akuzash me kompaninë “Gjoka Konstruksion” e cila ishte një prej ofertuesve në tenderin për tunelin e rrugës Kardhiq-Delvinë.
ARRSH e drejtuar nga Qato akuzoi kompaninë për falsifikim të dokumenteve në tender. Kompania u përgjigj duke akuzuar direkt Qaton për favorizim të një kompanie në garën për tunelin në fjalë. Pas akuzave dhe kundër akuzave tenderi u pezullua për një vit, por në korrik 2020 Gjoka Konstruktion u shpall fituese. Rruga u përfundua në qershor 2022.