Komisioni parlamentar për Edukimin dhe Median u përfshi nga debatet të martën gjatë seancave dëgjimore me institucionet për projekt-buxhetin 2023, pasi Agjencia për Media dhe Informim e krijuar në fund të vitit 2021 nga qeveria nuk ishte përfaqësuar në komision me titullarin e saj, Endri Fuga.
Endri Fuga ka shërbyer si këshilltar për mediat i kryeministrit Edi Rama për shumë vite dhe u emërua prej tij drejtor i agjencisë, e krahasuar nga organizatat e lirisë së shprehjes me një “ministri propagande”.
Opozita e cilësoi fyerje për Kuvendin dhe shkelje të rregullores mungesën pa arsye objektive të Fugës në komision dhe kërkoi që seanca të shtyhej. Në vend të tij ishte paraqitur zv/drejtori i agjencisë, Besmir Gjokutaj, i cili tha se ishte personi përgjegjës për zbatimin e buxhetit.
“Në çdo rast kanë ardhur ministrat dhe titullarët e institucioneve, Fuga nuk ka dhënë arsye objektive me shkrim për mosparaqitjen,” tha deputetja Ina Zhupa, duke shtuar se bëhet fjalë për një buxhet jo të vogël që përdoret për “propagandën e qeverisë”.
Por, për deputetët e mazhorancës argumentet e opozitës nuk qëndronin dhe seanca duhej të vijonte.
“Nuk është seancë raportimi me pyetje-përgjigje, por seancë dëgjimi për buxhetin,” tha Blerina Gjylameti.
Gjatë prezantimit të buxhetit të caktuar nga qeveria për punën e kësaj agjencie, Gjokutaj tha se shuma e akorduar prej 117 milionë lekësh ishte e mjaftueshme për pagat dhe siguracionet e 69 punonjësve të saj dhe shpenzimeve operative.
Deputeti Luçiano Boçi e pyeti zv/drejtorin se pse kjo agjenci i përdor taksat e shqiptarëve për të shpërndarë live dhe në çdo kanal komunikimi gjuhën “fyese dhe vulgare” të kryeministrit ndaj opozitës e mediave. Sipas Gjokutajt, pyetja ishte koment politik dhe ai nuk kishte tagrin që t’i përgjigjej.
Agjencia ka rol centralizues për marrëdhëniet me publikun të qeverisë, pasi në organikën e saj përfshihen të gjithë zëdhënësit e ministrive dhe të gjitha institucionet e qeverisë qendrore dhe punonjës të zyrës së Marrëdhënie me Publikun në kryeministri.
