Komisioneri për Mbrojtjen nga Diskriminimi, Robert Gajda, i kërkoi Komisionit të Ligjeve mbrojtje ligjore për buxhetin të premten, pasi referoi se ishte përballur me shkurtim të fondeve me akt normativ nga qeveria, duke vënë në rrezik funksionimin e institucionit.
Ai u komunikoi deputetëve gjatë seancës dëgjimore për projekt-buxhetin, shqetësimin për ndërprerjen e njëanshme të fondeve në prill të vitit 2022 nga qeveria.
“Ndjehemi të pasigurt gjatë vitit,” tha Gajda, duke kërkuar që ligjvënësi të fusë një modifikim në ligjin për komisionerin që t’i garantonte mbrojtje buxhetit në raste krizash.
“Ndërprerja me akt normativ na ka çuar në një situatë që aktualisht kemi fonde vetëm për paga, ujë e drita, dhe nuk kryejmë dot aktivitete të planifikuara për ndërgjegjësimin,” shtoi ai, duke theksuar se kufizimet e fondeve të kenë një lloj përshtatshmërie duke ruajtur funksionin e institucionit.
Gajda tha se arsyetimi që fondet janë shkurtuar për shkak të krizës nuk qëndron, pasi në raste krizash, roli i këtij institucioni është i rëndësishëm.
“Në raste krizash qeveria i cënon drejtat e njeriut më shumë, ndaj roli ynë është më i rëndësishëm dhe buxheti duhet të rritet, jo të shkurtohet,” shtoi ai.
Deputetët e opozitës e kritikuan komisionerin se ka mbajtur anën e qeverisë në rastet e cënimit të drejtave të njeriut dhe tani ankohet vetë për qeverinë.
“Ju nuk keni mbrojtur qytetarët, sidomos nga diskriminimi politik në rastet e heqjes nga puna,” tha deputetja Dhurata Çupi. Ndërsa kreu i grupit, Enkelejd Alibeaj e konsideroi çështjen serioze, por e quajti përplasjen me qeverinë “jo reale”.
“Pra ju po thoni se nuk keni funksionuar, qytetarët kanë qenë të pambrojtur? Pse nuk e keni çuar në Gjykatë Kushtetuese? ”pyeti ai.
Komisioneri i quajti indinjuese akuzat e opozitës dhe tha se në raportet e punës, vendimmarrjet më të larta i përkasin shkakut të diskriminimit politik.
Ndërsa në përgjigje të Alibeajt ai sqaroi se institucioni ka funksionuar, po nuk ka arritur të zhvillojë aktivitetet e planifikuara, ndërsa ripërsëriti kërkesën për mbrojtje ligjore ndaj prekjes së buxhetit në vijim.
Në seancë dëgjimore të insitucioneve të pavarura për projekt-buxhetin e ri ishte dhe Komisioneri për të Drejtën e Informimit dhe Mbrojtjen e të Dhënave Personale, Besnik Dervishi, i cili tha se edhe ky institucion “kishte punuar me llambë të kuqe gjatë vitit 2022”.
“Kemi pasur vështirësi që nga 2019, por kemi kursyer, kur nuk janë realizuar proceset e prokurimeve, tepricat ia kemi kthyer Ministrisë së Financave,” tha Dervishi.
Dervishi kërkoi shtesë fondi 80 milionë lekë për vitin që vjen për sigurimin e të Dhënave Personale dhe një shtesë në personeli me 11 persona. “Është nevojë emergjente, kemi sistem mbrojtje të vjetër,” tha ai duke bërë të ditur se administron dy databaza shtetërore.
Për ndërprerjen e një anshme të fondeve nga qeveria në buxhetin e 2022 janë ankuar një sërë institucionesh të pavaruara, të cilëve ua miraton Kuvendi buxhetin vjetor.
