Policia e Durrësit njoftoi të premten se kishte shpallur në kërkim Trifon Murataj aksioner i vetëm i kompanisë Zico Sha, në kontenierët me banane të së cilës u sekuestruan të enjten 33.5 kilogramë lëndë e dyshuar si kokainë.
Veç Muratajt, policia njoftoi arrestimin e administratorit të kompanisë 57 vjeçarit Petrit Demishaj për veprën penale “Trafikimi i lëndëve narkotike”. Ndërkohë u arrestuan edhe dy punonjës të skanerit që kishin lejuar kalimin e kontenierit. Alban Naziraj 48 vjeç (operator skaneri) si edhe Artur Sevdaraj 48 vjeç (imazhier skaneri).
“Nga hetimet dyshohet se këta shtetas, në bashkëpunim me njëri-tjetrin, kanë organizuar trafikimin e 33.5 kg kokainë, nga Ekuadori në drejtim të Portit të Durrësit”, njoftoi policia.
Lënda e dyshuar si kokainë u gjet të enjten në dy arka me banane, ndërsa policia tha se kishte pasur informacion për sasinë e drogës dhe pasi ngarkesa nuk ishte ndaluar në skaner përdoi një prej qenve antidrogë që gjeti pakot e dyshuara.
Fillimisht policia shoqëroi 8 punonjës të kompanisë që po priste ngarkesën me banane dhe punonjës të skanerit në Portin e Durrësit, duke arrestuar më pas administratorin e kompanisë, 2 punonjës të skanerit dhe shpalli në kërkim presidentin e kompanisë importuese të bananeve.
Operacioni policor u kodua në anglisht “Again” (Përsëri) dhe policia njoftoi vetëm se ngarkesa ishte porositur nga një kompani në Tiranë, por në pamjet e shpërndara për mediat kokaina qëndronte pranë arkave të shënuara me logon “Bana King”.
“Bana King” është një produkt që importohet në Shqipëri nga kompania Ziko Sh. A. dhe më herët më 28 Dhjetor 2021 në kontejnerin me banane të porositur në Ekuadori nga kjo kompani u gjetën 119 kilogram kokainë.
Edhe në këtë rast droga i shpëtoi skanerit dhe u gjet në ambientet e kompanisë. Në një rast të dytë më 16 Korrik 2022 në kontejnerin e kompanisë në Portin e Durrësit u konstatua se mungonin 49 arka me banane, për të cilat policia dyshon se ka patur kokainë.
Murataj në një intervistë televizive e ka mohuar përfshirjen ai ka pretenduar se kontenierët kontaminoheshin nga trafikantë në momentin e ngarkesës, por se kompania nuk kishte dijeni për praninë e drogës në arkat me banane.
Murataj nuk është i pari importues i bananes ndaj të cilit ngrihet akuzë për trafik të narkotikëve. Gjykata e Posaçme e Apelit dënoi me 14 vjet burg pas gjykimit të shkurtuar Arbër Çekajn pronar i kompanisë “Arbën Garden” ku u kapën 613 kilogramë kokainë. Ndërkohë pronarë të kompanive të ngjashme janë duke u gjykuar apo të shpallur në kërkim nga policia.
