Këshilli i Lartë i Prokurorisë zgjodhi të enjten kryetarin Alfred Balla si anëtar për komunikimin me median. Zgjedhja u bë pas botimit në fletoren zyrtare të një rregulloreje për marrëdhëniet me median, e cila është kundërshtuar nga ekspertë dhe gazetarë dhe për të cilën nga ana e KLP është premtuar rishikimi.
Ballës iu desh të përdorte votën e tij për të ndarë barazimin e krijuar nga votimi, ai mori 5 vota nga anëtarët e tjerë të KLP ndërsa 5 të tjerë ishin kundër. Propozimi megjithatë u miratua me 6 vota pro, pas debateve në Këshill. Disa nga anëtarët i kërkuan Ballës të tërhiqej nga gara, pasi në pozicionin e kryetarit ai kishte tashmë akses në media dhe se ky pozicion i ri e “monopolizonte” komunikimin e këshillit me të tretë.
“Komunikimi nuk është monopol i një individi në media”, tha anëtarja Mirela Bogdani, pas propozimit nga Komisioni i Zhvillimit të Karrierës.
Komisioni që bëri propozimin argumentoi zgjedhjen e Ballës me faktin që ai, si i ardhur nga shoqëria civile, kishte tashmë kontakte me median dhe se kishte kabinet dhe staf që mund ta realizonte këtë detyrë.
Anëtarët Zeqir Hoda, Tatar Bazaj dhe Nurihan Seitaj po ashtu kundërshtuan propozimin dhe kërkuan që anëtari për median të vinte nga radhët e prokurorëve. Ata këmbëngulën në faktin se Balla kishte tashmë të gjithë komunikimin e KLP me të tretët përfshi institucionet dhe përfaqësitë diplomatike dhe se shpesh ata nuk ishin në dijeni të asaj që KLP komunikonte për mediat.
“Puna juaj në kuptim të përfaqësimit të këshillit është kaq e dukshme”, tha Seitaj.
Hoda propozoi anëtaren e sapo zgjedhur Ledina Riza, por kjo e fundit e refuzoi kandidimin duke thënë se ende nuk e njihte mirë institucionin pasi “sapo kishte futur këmbët”.
Ndërkohë Baze la të kuptohej po ashtu se ky propozim ngarkonte kryetarin me më shumë kompetenca. “Nuk është qëndra e rëndesës kryetari”, tha ai duke kundërshtuar argumentet e propozuesve.
Balla vetë tha se e kishte mirëpritur propozimin e tij në këtë pozicion, por shprehu rezerva për pjesën e dytë të propozimit që e ngarkonte edhe me marrëdhëniet me publikun. Megjithatë ai nuk iu përgjigj shqetësimeve të ngritura nga kundërshtuesit se kjo sillte monopolizim të kontaktit të KLP me të tretë.
Zgjedhja u bë bazuar mbi rregulloren e re për marrëdhëniet me median që KLP miratoi në 11 tetor. Rregullorja është kundërshtuar ashpër nga gazetarë dhe ekspertë të medias që e shohin atë si përpjekje e KLP për të censuruar gazetarët duke i kërcënuar me heqje akreditimi dhe duke marrë vetë përsipër punën e redaktorit dhe atë të rregullatorit.
Flutura Kusari, juriste e së drejtës së medias në Qendrën Evropiane për Shtypin dhe Lirinë e Media në Leipzig, Gjermani, tha se ishte tronditëse që Këshilli i jepte vetes të drejta vlerësimi të punës së gazetarëve në rregullore. “Mesazhi është i qartë – na lavdëroni ose e humbisni të drejtën të raportoni nga KLP”, tha ajo.
Pas kritikave mbi rregulloren të marra në një takim me gazetarët, kryetari i Këshillit të Lartë të Prokurorisë njoftoi të hënën përmes një komunikimi në grupin Whatsapp të KLP me mediat se rregullorja do të rishikohej.
“Kam komunikuar me Kryetaren e grupit të punës së hartimit të rregullores së marrëdhënieve media-KLP dhe ramë dakord të iniciojmë disa ndryshime në të”, shkroi Balla duke njoftuar fillimin e procedurave dhe premtuar përfshirjen e gazetarëve në konsultim, diçka që nuk ishte kryer në kalimin e rregullores së parë.
