Të premten paradite lëvizja MJAFT prezantoi gjetjet e Indeksit Kombëtar të Hapjes Institucionale për pushtetin legjislativ dhe gjyqësor në Shqipëri.
“Hapja institucionale e gjyqësorit për vitin 2022 vlerësohet në 51%, ndërsa transparenca në 31% në nivel kombëtar”, tha Aldo Merkoci, drejtor ekzekutiv i lëvizjes MJAFT, gjatë prezantimit të tij.
Merkoci theksoi se performanca e gjykatave të rretheve është më e lartë se ajo e Tiranës, me gjykatën e Apelit të Tiranës të renditur të fundit në listë me 34.83% indeks performance, ndërsa e para renditet Gjykata e Apelit Shkodër me 61% indeks për performancën.
Ekspertët e lëvizjes MJAFT në kuadër të programit ActionALBANIA kanë monitoruar gjithsej 69 institucione të pushtetit gjyqësor, përkatësisht 30 prokurori dhe 39 gjykata në rang kombëar, duke akumuluar gjithsej 2913 të dhëna respektive gjatë periudhës Mars-Gusht 2022.
Ky monitorim i lëvizjes MJAFT u mundësua me mbështetjen financiare të Ambasadës Norvegjeze në Prishtinë dhe Partnerët Shqipëri për Ndryshim dhe Zhvillim.
“Fatkeqësisht shohim se Gjykatat e Rretheve të vogla kanë përqinde më të lartë të hapjes institucionale, ndërsa gjykatat e rretheve të mëdha figurojnë me një hapje më te ulët institucionale”, tha Aldo Merkoci, drejtor ekzekutiv i Lëvizja Mjaft në Shqipëri.
E njëtja dukuri vihet re edhe me prokuroritë, ku gjetjet tregojnë se Prokuroria e Apelit Durrës kryeson listën e performancës në Hapjen Institucionale me indeks 64.8%, ndërsa e fundit në listë për performancën ndodhet Prokuroria e Apelit Tiranë me indeks 49.96%.
Lidhur me transparencën dhe llogaridhënien e institucioneve të gjyqësorit, Merkoci theksoi rëndësinë e trajnimit të Koordinatorëve për të Drejtën e Informimit për rolin dhe detyrat e tyre.
“Shpeshherë koordinatorët nuk kanë një detyrë apo pozicion specifik, roli i tyre i shtohet detyrave të nëpunësve apo stafit ekzistues, dhe si pasojë ata nuk janë të mirëinformuar për rolin”, tha Merkoci.
“Ka patur raste që dokumentat gjenden në portalin e Gjykatës, por kur publiku i ka kërkuar nëpërmjet koordinatorëve për informim, dokumenta të tillë janë refuzuar për shkak se vetë koordinatorët nuk janë në dijeni të ekzistencës së tyre”, përfundoi Xheni Lame, koordinatore projektesh pranë lëvizjes MJAFT.
